Bonu kanpainaren seigarren ekitaldia gaurtik martxan
Bizi Errenteria bonuak etxe guztietara helduko dira gaurtik hasita datozen egunetan. Herritarrek abenduaren 11ra arte ahalko dituzte erabili atxikitako establezimenduetan hobariak jasotzeko.
![](https://oarsoaldea.hitza.eus/site/files/2024/09/dsc_0038.jpg)
Familiak zein tokiko saltokiak babestu eta herrian, denda txikietan erosteko ohiturak zabaltzea helburu du Errenteriako Udalak Bizi Errenteria bonu kanpainaren bidez. 2020an abiatu zuen iniziatiba pertsonak eta herriaren bizigarritasuna erdigunean jarriz, eta gaur eguerdian, bonu kanpainaren seigarren ekitaldia aurkeztu du Aizpea Otaegi alkateak, Leire Mazizior (EH Bildu), Maite Gartzia (Elkarrekin Errenteria), Isaac Palencia eta Almudena de la Torrre (PSE-EE), Elixabete Murua (EAJ) eta Antonio Vicente (PP) zinegotziekin, Errenkoaldeko presidente Maika Martin eta Beraungo hainbat merkatariekin batera.
Errenteria-Oreretako etxe guztietara helduko dira hobari bonu horiek aste honetan, eta buzoietara adi egoteko eskatu du Otaegik, horrenbestez. Adin tarterik ez dute izango, familiako bonu sorta bana jasoko dute herritarrek, bosna euroko lau bonu, zehazki. 18 eta 35 urte arteko gazteek gainera, bonu gehigarriak jasoko dituzte —bost euroko launa eurek ere— herrian erosteko ohitura sustatzeko haien artean.
Kanpaina berriari begira, ia miloi erdi euroko inbertsioa egin du udalak. Helburua argi azaldu du Otaegik, “herriaren eta herritarren suspertze ekonomiko zein soziala bultzatzea da xedea”.
Behin jasota, bonuak gaurtik hasi eta abenduaren 11ra arte erabili ahalko dira kanpainarekin bat egin duten establezimenduetan hobaria jasotzeko: merkataritza, zerbitzu, ostalaritza establezimenduetan, eta zuzenean publikoari saltzeko baimena edo parekoa duten nekazaritzako erregimen bereziko jardueretan.
Bonu bakoitzarekin 10 euroko edo gehiagoko erosketetan 5 euroko hobaria jasoko dute herritarrek. Bonuak batera erabiltzeko aukera izango da, beti ere aplikatutako hobariak ez badu gastu osoaren %50 gainditu.
250 establezimendu
Aurreko kanpainetan 250 establezimendu baino gehiagotan erabili ahal izan dira bonuak. Horien zerrenda, hemen klik eginda kontsulta daitezke. gainera, atxiki diren merkataritza saltokiek Bizi Errenteria ikurra izango dute ikusgai.
Orain arte atxiki ez diren saltokiei deia gaur Otaegik eta Martinek bat egin dezaten, “iniziatibaren eraginkortasuna areagotzeko garrantzitsua baita ahalik eta herriko eragile ekonomiko gehienen parte hartzea”.
Aurreko kanpainetan bezala fisikoak izango dira bonuak eta establezimenduek Bizi Errenteria aplikazioaren bidez balidatu beharko dituzte; udalak aplikazioaren bidez balidatutako bonuen ordainketa egingo du”.
Zalantzak argitzeko 010 eta 943 44 96n 00 telefono zenbakiak jarri ditu udalak.