Astero plan bat Kuadrillategin
2024-2025 ikasturtean ere kuadrillako kideekin, herrikideekin edo eskualdeko beste herritako gazteekin planak euskaraz egiteko aukera izango da Kuadrillategirekin.
![](https://oarsoaldea.hitza.eus/site/files/2024/09/kuadrillategi2.jpg)
Oarsoaldeko lau herriek Kuadrillategi izango dute berriz ere hastear den ikasturtean. Gazteek euren planak egingo dituzte astean behin, kuadrillan eta euskaraz. Oarsoaldea Garapen Agentziak jakinarazi du jada Kuadrillategin izena emateko epera zabalik dela. Esteka honetan klik eginda iritsiko dira interesdunak izen-emate orrira. Izena emateko aroa hilaren 23ra arte da zabalik Lezon, Pasaian eta Oiartzunen; 30era arteko epea izango dute errenteriar gazteek. Urriaren 4an (ostirala) hasiko dira saioak.
Lezon, Errenteria-Oreretan eta Pasaian DBHko lau mailetako kideek eman ahalko dute izena Kuadrillategin. Oiartzunen, berriz, DBH1 eta DBH2koek. Lezon eta Pasaian, gainera, Batxilergoko ikasleek ere aukera dute aisiaz taldean euskaraz gozatzeko, Faktoria egitasmoarekin.
“Euskaraz ongi pasatzeko gogoa dutenek osatzen duten kuadrilla honetan denen artean prestatutako jarduerak, irteera bereziak, egun pasak eta asteburuetako irteerak egiten dira. Eta beste herrietako gazteekin elkartzeko aukera dago”, esan dute egitasmoaren bultzatzaileek.