Olinpikoak dira Lezoko gazteak
Goiz partean ekin diote Gazte Egunari Piztu Lezok antolatuta kuadrillen arteko herri olinpiadekin. Bazkarian hamarka gazte bildu dira Saldise plazara, eta musikak jarriko du ginga.
Goizean Herri Olinpiaden finalak jokatu dituzte Saldise plazan. Argazkia: Gorka Izulain Beldarrain Arin daude. Dudarik ez da, eta hala erakutsi dute Lezoko gazte kuadrillek gaur eguerdian jokatutako kuadrillen arteko herri olinpiaden final handian. Arin, sasoian eta indartsu, banan bana elegante osatu dituztelako Piztu Lezok jarritako erronka den-denak.
Bertaratu diren ikusle finen babesa eta animoak ez dituzte falta izan, gainera, ganoraz aritzeko. Herri kirolen argazki guztiak Gorka Izulain Beldarrain gazte lezoarrak eginak dira.
Energia eta indarrak berreskuratzeko zer hobe mahaiaren bueltan lagun giro goxoan elkartzea baino. Hala egin dute, eta Karlos Saldise plazan hamarka eta hamarka gazte kuadrilla —360 gazte izan dira bazkarian— bildu dira paellarekin gozatzeko. Giro ederra zuten bazkal orduan, eguzkiak era ez du hutsik egin, eta eguerditik gaueko ordu txikietara olatu arrosak hartuko du herria.
Arratsaldean zumba saioa izan dute euskal musikak lagunduta, eta ondoren kale buelta izango dute Sakatu elektrotxarangak lagunduta. Bidean taldeak hartuko du lekukoa Saldisen erromeria eskainita, eta bukatzeko Oarso Grooveren eskutik tekno gaualdia izango da.
