Zazpigarren postua Iñigo Iglesiasentzat Courseko zirkuituan
Lasterketa buruan aritu da ia denbora osoan, baina euriak arriskutsu bilakatu duen zirkuituan arduraren aldeko hautua egin du errenteriarrak.
Iñigo Iglesias gaurko lasterketan. Nevers Magny (Cours, Frantzia) zirkuituan jokatu da Super Sport 300 motoziklismoko Munduko Txapleketaren 11. lasterketa. Bertan izan da Iñigo Iglesias pilotu errenteriarra. Laugarren irten den lasterketaren buruan izan da zatirik handienean euriak arriskutsu bilakatu duen zirkuituan, eta azkenean, zazpigarren helmugaratu da. Arduraz aritu dira lasterketan, arriskatzea, erorketa baten sinonimo bihurtu delako gaurko lasterketan. Motoaren suspentsioarekin ez da oso gustura aritu errenteriarra, baina puntsuak poltsikoratzea lortu du azkenean.
Gaurko lasterketaren ondotik, sailkapen orokorreko hirugarren postuan da Iglesias 138 punturekin, duen areriorik zuzenenak, Mahendrak, taula horretan lidergoa hartu baitu bigarren sailkatuta gaurkoan. 148 puntu ditu Indonesiarrak. Veneman herbeheretarra hamaseigarrena izan da gaurko lasterketan eta lehen postutik bigarrenera pasa da sailkapen orokorrean 139 punturekin.
Iglesias eta bere taldea pozik daude gaur lortu duten emaitzarekin lasterketaren baldintzak kontuan hartuta, “tartea oso txikia da eta edozein lasterketetan aldatzea daude postu horiek. Argi dago borrokatzen jarraitu beharra dugula ahalik eta puntu gehien lortzeko gertuko arerioengandik gehiegi urrundu gabe”. Bestelakoa espero da biharko lasterketa, ez baitago euri aurreikuspenik.
