"Lezon eraso sexistek jai dute"
Santakrutz Jaiak askatasunean eta erasorik gabe bizitzeko deia egin dute Iruntzenek, Gaxuxak eta Piztu Lezok.
Ostiralean hasiko dira 2024ko Santakrutz Jaiak. Horri begira Iruntzen eta Gaxuxa emakume taldeek, nahiz Piztu Lezok aldarrikatu dute askatasunean bizi eta gozatu behar direla festak, “Lezon eraso sexistek jai dute”, esan dute. Horregatik, herritarrei nahiz bisitan etorriko direnei dei egin diete errespetuz joka dezaten, “denon ardura delako jaietako espazioak askeak eta seguruak izatea”.
Irmo adierazi dute erasoen aurrean duten iritzia: “Ozen eta garbi esan nahi dugu Lezoko jaietan ez dugula inolako eraso matxistarik, sexistarik eta transmaribibollofoborik onartuko”. Hala, gisa horretako erasoren bat balego, jendarteari dei egin diote aktibo izateko, ekintzetara pasatzeko. Beraz, halakorik ikusiz gero lehenik erasoa jasan duena babesteko eskatu dute, eta aldi berean, horren berri emateko honako telefono zenbakietara deituz: 688 69 62 04 (irailaren 13 eta 14an, 00:00etatik 06:00etara), eta egunero (egunez) 943 52 46 50.
