Pontikako aparkaleku eraikin berria zabalik da
Pontikako aparkaleku berria martxan da eta hilaren 16tik aurrera TAO gunea zabalduko dute.
Otaeggi eta del Amo Pontikako aparkaleku eraikin berriaren aurrean. Martxan da Pontikako aparkaleku berria. Eraikina amaituta, esleipendunak atzo hasi ziren 50 urterako emakida kontratuak sinatzen. Lau urterako alokairu kontratuak, berriz, datorren astelehenetik —hilak 16— aurrera sinatuko dituzte, eta egun horretan bertan jarriko dira martxan txandakako aparkalekuak ere TAO erregimenean.
Xehetasunak denak emateko agerraldia egin dute gaur eguerdian Aizpea Otaegi alkateak eta Eneko del Amo Hirigintza zinegotziak aparkaleku berriaren aurrean. Aparkaleku eraikina lotuta dago Beraun kalearen eraberritze integralarekin, hala esan du alkateak, “gorago beste interbentzio batzuk egiten ari gara, eta kalearen zati hau ere berritzearen parte da. Aparkalekua bera eraikitzeaz aparte, inguru guztia txukundu eta antolatu da”.
Horrez gain, Barandiaran Parkearekin lotu du Otaegik: “Honek asko hurbiltzen gaitu dagoeneko Barandiaran parkea eraikitzeko egin beharreko obretara eta gainera, hau behin irekita, eremu hartan aparkatzen duten autoak ateratzeko aukera izango da, OTA bidezko txandaka aparkatzeko sistema astelehenean martxan jarrita”.
Obrak hasteko itxiturak jarriko ditu udalak Barandiaran parkea izango denaren eremuan hilaren 23an, “autoek eremua hustuta hasiko dira lanak”.
Pontikako aparkaleku eraikin berria egiteko 3, 7 milioi euroko inbertsioa egin du Errenteriako Udalak. 180 plaza ditu eraikinak autoentzat eta sei motoentzat. Autoentzako 66 plaza eta motorrentzako guztiak, lau urterako alokairurako dira. Kotxeentzako beste 31 plaza, 50 urterako emakida bidezko aparkalekurako dira, eta gainerako 83 tokiak, txandakako aparkalekurako.
Auto elektrikoentzako plazak ere aurreikusi dituzte aparkaleku berrian, lau denera, “emakida edo alokairu sisteman aurreikusi diren aparkaleku eremuetan instalazioa prest dago autoa elektrikoa dutenek kargatu ahal izateko”.
Aparkatzeko premiari erantzuna emateko eraiki duela udalak Beraun kaleko eraikina azaldu du Otaegik, “horrekin batera Barandiaran Parkearen eremua aparkaleku gisa erabiltzen duten auto horiek aparkaleku eraikin berrira bideratu nahi izan ditugu. Aparkalekua izateko oso eraikin ederra da, duina, auzoari maila estetikoan ere ekarpena egiten diona”.
Eraikina bukatuta, Beraun eraberritzeko gainontzeko faseetan aurrera egitea geratzen zaio udalari, etxe aurretako plazak berritzeko prozesuak oso aurreratu daude eta laster batean bukatuta izatea aurreikusi du alkateak, “azkeneko txanpa geldituko da kalearen eraberritzea biribiltzeko”.
Barandiaran parkearen lehen fasea
Argi esan du Otaegik, “asko kosta zaigu honaino iristea, baina egiazki inoiz baino hurbilago da Barandiaran parkea”.
Parkea egi bihurtzeko bidean lehen fasea da martxan jarriko duena udalak, eta gehienez ere, dena ondo bidean, urtebete iraungo du gehienez ere Otaegik esan duenez. Lehen fase horretan lur mugimendu guztiak egitea egokituko da, “lur mugimendu horiek emango digute jada parkearen orografia. Gehienez ere urtebete iraungo dute lan horiek eta lurrak mugituta eta behar den lekuan kokatuta eraikuntza fasea bera helduko da. Agintaldi bukaerarako parkeak egina behar luke ezer okertzen ez bada”.
