Teknologia denen eskura jarriko du TEKS elkarteak berriro
Gailu teknologikoak erabiltzen ikasi, edo horiek erabiltzeko beldurra galdu nahi dutenak dira hartzaileak. Asteartean hasiko dituzte ikastaroak.
Torrekuako hirugarren solairuan izango dira ikastaroak. Arrakala teknologikoa bistakoa da, eta horren aurrean, tailerrak antolatu ditu TEKS elkarteak, berriro. Hartzaileak, gailu teknologikoak erabiltzen ikasi nahi dutenak, baita jakinda ere, horiek erabiltzeko beldurra galdu nahi dutenak dira.
Horri begira hainbat tailer antolatu dituzte datorren asteartean hasi eta azarora arte, Teknologia denontzat goiburuarekin. Euskaraz zein gaztelaniaz izango dira tailerrak eta Torrekua eraikineko hirugarren solairuan izango dira goizez.
Saio bakoitzaren informazio zehatza hemen klik eginda kontsulta daiteke. Izena eman nahi dutenek, berriz, galdetegia bete behar dute (klikatu hemen).
Ikastaroez gain, zalantzak argitzeko txokoa ere zabalduko du TEKS Teknologia Libre eta ekonomia sozial eraldatzailearen markoan dabiltzan enpresa eta kooperatiben sareak: “Ez da tailer bat izango, laguntzarako espazioa baizik eta herritar orori zabaldua egongo da”. Ordenagailuarekin edo eskuko telefonoarekin zalantzak edota arazoak dituzten herritarrek jo dezakete Torrekuara, “laguntza eskainiko diegu, kosturik gabe”.
Ikastaroak
- Irailak 17, asteartea (10:30-12:30). Mugikorraren oinarrizko erabilera: Zein aukera ditu nire mugikorrak? Nola konfiguratu dezaket? Nola erabili aplikazioak?
- Urriak 8 (10:30-12:30). Nola Babestu zure mugikorra: Zein datu jasotzen ditu nire mugikorrak? Nola konfiguratu dezaket? Konexio seguruak nola egin ditzaket?
- Azaroak 5 (10:30-12:30). Garbitu zure mugikorreko zaborra: Nola liberatu nire mugikorreko memoria? Aplikazioetako zaborra nola garbitu? Ze aukera ditut?
- Teknologia zalantzen txokoa: Irailak 17 eta 24; Urriak 22 eta 29 ; Azaroak 19 eta 26 . 10:30-12:30
