Asko hazi da Arkirunen pilota eskola
Aurreko urteetako kategoriei, Gazte Mailakoena gehitu diete. Hilaren 30ean hasiko dituzte entrenamenduak Koldobide Gezala pilotalekuan.
Hilaren 30ean (astelehena) hasiko da Lezoko Arkirun Pilota Kluba pilota eskolaren barruko entrenamenduekin. Txiki hasi zen hura, asko hazi da. Horren seinale da aurten lau kategoriako pilotarientzako lekua egin dutela euren eskaintzaren barruan: benjamin, kimu, haur eta gazte mailetakoentzat (kadeteek haiekin entrenatuko dute) zabaldu dute izena emateko aukera, neska eta mutilentzat. Beraz, lehen hiru kategoriak azken urteetakoak izan badira ere, irailetik ekainera arte luzatuko den sasoirako Gazte Mailako taldea sortu berri dute. Apuntatzeko eskuorriak herriko ikastetxeetan banatu dituzte, baina norbaitek proiektuaren gaineko informazio gehiago nahiko balu entrenamenduetara joatea edo 663 17 30 66ra deitzea (Gari) besterik ez du.
Esan bezala, hilaren azken egunean hasiko dira entrenamenduekin eskuzko pilotarekin bat egingo dute gazteak, Koldobike Gezala pilotalekuan. Gainera, emakumeen taldeak ere bidea egingo du aurten, osteguneroko entrenamenduekin. Hain dimentsio zabala hartu dutelako, ia astegun guztietarako egokitu dituzte trebatze saioak Arkiruneko kideek, horrela banatuta:
- Gazte Mailakoen entrenamenduak: astelehen eta asteazkenetan 18:00etatik 19:30era.
- Haur Mailakoen entrenamenduak: asteartetan (18:45) eta ostegunetan (17:00-18:30).
- Kimu Mailakoen entrenamenduak: astelehenetan 17:00etatik 18:00etara.
- Benjamin Mailakoen entrenamenduak: asteazkenetan 18:00etatik 19:00etara.
- Emakumeen taldearen entrenamenduak: ostegunetan 18:30etik 20:00etara.
