Astelehenean hasiko da EPLEko Pilota Eskolaren denboraldia
Oreretar gazteak eskuz eta palan trebatu ahal izango dira, benjamin, kimu, haur eta kadete mailetan. Ikastaroak Agustina Otaola pilotalekuan izango dira.
Pilota Eskolako kideak Agustina Otaola pilotalekuan. argazkia: EPLE Astelehenean, hilak 16, Pilota Eskolako ikastaroak hasiko dira Agustina Otaola pilotalekuan. EPLE taldea arduratuko da Pilota Eskolaren kudeaketaz, eta Errenteriako Udalaren laguntza izango du. Eskuz eta palan trebatu ahal izango dira oreretar gazteak, benjamin, kimu, haur eta kadete mailetan.
Eskuko ikastaroak Pilota Eskolako benjamin eta kimuei begirakoak dira. Benjaminen entrenamenduak, hau da, 2015 eta 2016 urteen artean jaiotakoenak, astearte eta ostegunetan izango dira, 17:00etatik 18:00etara. Kimuen saioak (2013 eta 2014 artean jaiotakoak), aldiz, asteazkenetan 17:00etatik 18:00etara eta ostegunetan 18:00etatik 19:00etara izango dira.
Palako ikastaroak, berriz, Pala Eskolako kimu, haur eta kadeteei zuzenduta daude. Entrenamendu hauek 2009 eta 2014 urteen artean jaiotako gazteei begirakoak dira, eta saioak astearteetan izango dira, 18:00etatik 19:00etara.
Hilaren 16tik ekainaren erdialdera arte egongo da zabalik Pilota Eskolan izena emateko epea, eta doakoa da. Eskuz edo palan trebatzeko interesa duten gazteak Agustina Otaola pilotalekura gerturatu daitezke bi modalitateak probatzera, konpromisorik gabe.
Argibideetarako, EPLEk 680 71 94 22 telefono zenbakia eta helbide elektronikoa jarri ditu interesdunen eskura.
