Nork egin ahal izan du lo Lezon?
Emozio eztanda atzo Lezon santakrutzen lehen egunean. Elkarteen danborradek arras girotu dituzte kaleak eta plazak.
Indartsu hasi dira Lezoko festak, santakrutzak. Txupinazoaren ekitaldian usain zitekeen gozatzeko gogoz iritsi direla lezoarrak herriko urteko bigarren festetara. Atzoko bigarren ekitaldi jendetsuenean agerian gelditu zen nahi eta desio hori: elkarteen danborrada sekulakoa izan zen.
22:45ean atera ziren Ixkulin, Tiñelu, Altzate eta Allerruko burrunbarien taldeak. Nork bere bidea egin ondoren, Gurutze Santuaren plazara iristen hasi ziren tantaka lau segizio handiak. Bete-bete zen ordurako herriaren erdiguneko zabalgunea; danbor jotzaileei tartea utzi zieten herritarrek, eta festak jarraitu zuen. Nola gainera! Lau danborradetako ehunka partaideek hainbat pieza jo zituzten, publikoaren erabateko onespenarekin. Bukatzear zirela, jada klasiko denari ekin zioten: Txoria txori abestu zuten.
Santakrutzen lehen eguneko adrenalina eta emozio saltsa ia kontrolaezinarekin joan ziren herritar dezente euren etxeetara, gaurkoa egun latza delako: Santakrutz Eguna, I-14 Eguna. Nola ez, izan ziren emozio horiei jarraipena eman eta gaueko-goizaldeko giroarekin bat egin zutenak. Beraz, nork egin ahal izan du lo Lezon?
Jarraian, bat gaueko danborraden irudi sorta eta bideoa, Ekaitz Arrieta lezoarrak HITZAri emandako materiala baliatuta.
Santakrutzak 2024. Gaurko egitaraua.
Gaurko (larunbata) egitaraua
- 10:00. Diana Munttarreko txistulariekin.
- 11:00. Haur jolasak, hondarrarekin, Karlos Saldise plazan.
- 12:00. Herri kirolak Gurutze Santuaren plazan: Laiane Pikabea, Oihana Barrena, Eneko Otaño eta Ibai Soro aizkoran, eta Inazio Perurena harria jasotzen.
- 12:00. Lezoko eta Txantreako buruhandi eta erraldoien kalejira Munttarreko txistulariekin.
- 12:00. Kuadrillen arteko probak Goiko Plazan.
- 12:30. Lezoko Dantzazaleen XIII. Muxiko Eguna, Oinkada taldearekin, Goiko Plazan.
- 12:30. I-14 egunaren topaketa Kale Nagusian, Txirbilla Sound Systemek girotuta.
- 14:00. Erretiratuen bazkaria.
- 14:30. I-14 eguna hasteko txupinazoa Gurutze Santuaren plazan. Jarraian, talde argazkia.
- 15:00. I-14ko herri bazkaria Lezo Herri Eskolako jolastoki estalian.
- 17:00. Denentzako puzgarriak eta Xaibor taldearen kontzertua Goiko plazan.
- 17:30. Josetxo Etxandi XLVIII. Oroitaldiko federatuen finalak Koldobike Gezala pilotalekuan.
- 18:00. Erraldoi eta buruhandien kalejira Munttarreko txistulariekin.
- 18:00. Lezo Herri Eskolatik abiatuta, kalejira Jaixkipe txarangarekin.
- 19:00. Anersote DJa Gurutze Santuaren plazan.
- 20:30 Lehian erromeria taldea Karlos Saldise plazan.
- 22:00. Zezensuzkoa Gurutze Santuaren plazan.
- 22:45. Kilometro Lezoren barruko dantza bertikal saioa, Santokristo elizaren paretan, Harrobi taldearekin: Geure(R)a.
- 23:30. Kaparrak taldea Karlos Saldise plazan.
- 01:00. DJ Fifi ta Fefa Karlos Saldise plazan.
