Biteri 30etik Nafarroa hiribidera, bidea urratzen jarraitzeko
Hogeita hamar urte luzez etxea eta arnasgune izan duen Biteri 30eko euskaltegiari agur esan dio Xenpelar AEKk Nafarroa Hiribidean bidea urratzen jarraitzeko.
Biteri 30eko egoitzari agur esan dio Xenpelar AEK-k. Argazkia: Arkaitz anza Ametsa beteta, euskaldun oso irten dira hamarka eta hamarka herritar Biteri kalearen 30eko lehen solairuko Xenpelar AEK euskaltegitik azken hogeita hamar urte luzeetan. Larunbatean itxi zituen arnasgune horrek ateak betiko—Xenpelar AEK gisa—, bertatik pasatako ikasle, irakasle eta irakasle ohi, zein bidean ezinbesteko izan diren eragile eta norbanakoek eskainitako agur goxoarekin. Aurrerantzean, Nafarroa Hiribideko 67an jarraituko du euskaraz bizitzea xede dutenen ametsa egi bihurtzen Xenpelar AEK-k.
Aitortza eta esker on hitzak entzun ziren Biteri 30ean ekitaldirako jarritako oholtza gainetik pasa zirenen ahotik. Kalejira trikiti eta kantu jirak lagunduta euskaltegiaren egoitza berriraino, zinta mozketa AEKko beteranoen eskutik, zizka-mizkak, Ibai Maritxalarren artelan ederra opari—hura ere izan zen Xenpelar AEKn irakasle—, eta Koldo Mitxelenako jolastokian antolatutako bazkaria musikatuarekin ondu zuten agur ekitaldia. Tartean, hamaika emozio, beste hainbeste pasadizo, eta bizipen ugari mahaiaren bueltan.
AEKko beteranoek ereindakoak, fruitu emankorra eman duen zalantzarik ez da. Ondorengoek, zein oraindik ere AEKrekin engaiatuta jarraitzen duten beteranoek, indarra eta konpromiso itzela dutela argi utzi dute. Garaiak eta euskaltegiaren egoitza aldatuagatik ere, 1985 hartan Gau Eskoletako txinpartatik sortutako Xenpelar AEK haren helburua bera izaten jarraitzen du, eta horrela berretsi dute: Euskal Herria euskalduntzea, herrigintzatik eraginda.
Ondoko argazki galeria eta bideoa Arkaitz Anzak larunbatean jasotako irudiekin eginak dira.
