Legorburu aita-semeak saritu dituzte Lazkao Txiki bertsopaper lehiaketan
Iñigo Legorburuk lehenengo eta hirugarren postuak lortu ditu; Ekain Legorburu, bigarren sailkatu da Gazteen kategorian.
Iñigo eta Ekai Legorburu saria jasotzeko unean beste irabazleekin. Sariek ez dute sekreturik Iñigo Legorbururentzat, literaturaz edota bertsolaritzaz ari bagara, bederen. Beste behin ere, saria etxera eraman du errenteriarrak; sari hori bikoitza izan da gainera, bere bi lan irabazle izan baitira Ordiziako Barrena elkarteak antolatutako Lazkao Txiki bertsopaper lehiaketan.
Irreal apolitik lanarekin lehen saria jaso du eta horren trukean 500 euro eta Txikia oroigarria. “Lanean herritarrak letra larrizko politikaren aurrean zein txiki sentitzen garen batzuetan transmititzen saiatu naiz, Palestina, baxoa azterketa edo auzolanaren beherakadari aipamena eginda”. Beste sari bat ere lortu du Legorburuk lehiaketa horretan, hirugarrena zehazki, eta beste 300 euro poltsikoratu. Hamarren bularra lanarekin lortu du azken sari hori eta bertan minbizia duen emakume baten paperean sartu dela azaldu du egileak, “gizarteak zein presio eragiten dion islatzen saiatu naiz, beti ere nire gizonezko ikuspuntu subjektibotik”.
Sari guztiak pozgarri izango dituen zalantzarik ez da, baina honakoa, bereziagoa izan dela aitortu du, “hogei urte kostatu zait lehenengo saria irabaztea. Lehenengo aldiz 2004an irabazi nuen, eta bost edo sei aldiz bigarren eta hirugarren izan naiz. Aurten irabaztea, oso pozgarria izan da niretzako”.
Poztasun berezi horrek beste arrazoi bat ere badu. Izan ere, sariketa berean baina gaztetxoen kategorian saritu dute Ekai Legorburu. Errenteriarraren semea bigarren sailkatu da eta 100 euroko dirusaria lortu 11 urterekin. Olinpiar jokuak badatoz lanarekin eskuratu du saria. Nolako zura, halako ezpala.
