Herri oso bat desfilean
I-14aren ajerik ez atzo Lezon. Artzain eta inudeen desfilean ehunka lezoar batu ziren, igandeari izaera berezia emateko.
Santakrutzetako igandea atzokoa, 1-14 egun handiaren biharamuna. Eguneko izarra, goizeko artzain eta inudeen desfilea, Lezoko Desfilearen Aldeko Taldeak antolatua. Agian, gehiegitxo da esatea herri oso bat kalean izan zela, baina lezoarren zati handi bat koloretsu jantzi zen, nor bere papera interpretatzeko, eta kaleak eta plazak alaitzeko. Beste zati handi bat bide ertzetan pozik aurrean zutenari so. Eguerdiko eguzki epelak asko lagundu zuen dena egoki joan zedin. Izan ziren esnatu berri, I-14 egun luzearen ondoren, balkoitik ikusi zutenak segizio ikusgarri eta erakargarria. Santakrutzak bakoitzak nahi dituen erara bizi baititu.
Behean, atzoko desfilearen 70tik gora irudi eta bideoa, Ekaitz Arrieta lezoarrak HITZAra bidalitakoak denak.
Gaurkoa Baserritarren Eguna da. Goizeko ganadu feriak nahiz idi-demak (arratsaldean ere egingo dute), zein bertso bazkari eta bertso saioek leku berezia izango dute. Badira gauza gehiago, ordea. Beheko zerrendan ikus daiteke gaurko egitaraua, 2024ko Santakrutz Jaietako azken egunekoa alegia.
Gaurko egitaraua
- 09:30. Ganadu feria Josetxo Etxandi pilotalekuan.
- 10:30. Toka, igel eta poto lehiaketa Goiko Plazan.
- 12:00. Idi-dema probalekuan.
- 13:30. Ganadu feriaren sari banaketa probalekuan.
- 14:00. Bertso bazkariak Ixkulin elkartean (Sebastian Lizaso eta Andoni Egaña) eta Tiñelu elkartean (Maddi Ane Txoperena eta Aitor Mendiluze).
- 17:00. Apar festa eta askaria Karlos Saldise plazan.
- 18:00. Idi-dema probalekuan.
- 19:00. Buruhandi eta erraldoiak herritik, Munttarreko txistulariekin.
- 20:00. Bertso saioa Gurutze Santuaren plazan. Bertsolariak: Andoni Egaña, Sebastian Lizaso, Maddi Ane Txoperena eta Aitor Mendiluze. Gai jartzailea: Amaia Agirre.
- 22:00. Zezen suzkoa Gurutze Santuaren plazan.