Zaleei agur esateko kontzertuetako bat Lekuonan egingo du Chill Mafiak
Azaroaren 16an (larunbata) izango da kontzertua. Azken birako sarrerak bihar 10:00etan jarriko dituztela salgai jakinarazi du taldeak.
Azaroaren 11n iragarri du azken biraren barruko kontzertua Lekuona Fabrikan. Argazkia: Chill Mafia Chill Mafia taldeak bidea bukatu du. Hala jakinarazi du gaur, azken diskoa duen Agur eta ohore. X alla va la despedida diskoa aurkeztearekin batera. Iruñerriako trap estiloko musika taldeak probokazioa eta autotunearen erabilera ditu bereizgarri, eta 2021ean egin zen ezagun, Gazte arruntaren koplak abesti eta bideoklipari esker. Agur biraren barruan kontzertua emango dute Errenteria-Oreretan: azaroaren 16an (larunbata) izanen da.
Disko berriak bederatzi kanta ditu.
Despedidarako zenbait kontzerturen berri eman du Chill Mafiak, eta horietako bat Errenteria-Oreretako Lekuona Fabrikan iragarri du, azaroaren 11n, astelehenarekin. Azken bira horretako sarrerak bihar goizean, 10:00etan, jarriko dituztela salgai jakinarazi du taldeak, eta horiek lortzeko lotura ere zabaldu du Chill Mafiak (egin klik hemen).
Errenteria-Oreretako sarrerak erosteko aukera aurrerago zabalduko dutela jakinarazi dute Errenteriako Udaleko Kultura departamendutik. Data zehatza ez badute jakinarazi ere, urria hasieran izango dela azaldu dute, “hiruhilero kultur eskaintza aurkezteko agerraldia egiten dugu, eta prentsaurreko hori eginda jarriko dira salgai betiko bideetatik, online (klik hemen).Lasaitasun mezua beraz, Chill Mafiakoen kontzertua Lekuona Fabrikan ikusi nahi dutenei, aurrerago izango baitira sarrera horiek salgai.
Euskal Herrian egingo dituen kontzertuak honakoak dira: urriaren 31n Gasteizko Jimmy Jazz aretoan; azaroaren 16an, Errenteria-Oreretako Lekuona Fabrikan; abenduaren 25ean, Iruñeko Zentral aretoan; eta urtarrilaren 3an, Bilboko Kafe Antzokian.
