Garagardoak elkartuko ditu lezoarrak beste behin
Hilaren 26tik 28ra Karlos Saldise plazak hartuko du Tiñelu elkartearen hamargarren Garagardo Festa. 130 boluntario arduratuko dira den-dena egoki bideratzeaz.
Iazko Garagardo Festaren une bat. Herriak festa aro berezia bizi du. Hileko bigarren asteburuan Altamirako festak eta Gazte Eguna izan ziren; aurrekoan Santakrutzak. Asteburu honetako atsedenaren ondotik, prestatu datorrenerako: hilaren 26tik (osteguna) 28ra Tiñeluren Garagardo Festa jasoko du Karlos Saldise plazak. Hamargarrena da.
Gradu eta tankera ezberdineko hamalau garagardo izango dira aukeran, horietako bat alkoholik gabekoa, zerbeza bete pitxerraren prezioa (edalontzi hori aurretik erosi behar da, 2,50 euroan) 3,50-4,50 euro artekoa izango delarik. Glutenik gabekoak ere badaude.
Jatekorik, noski, ez da faltako. Txerri ukondoa, saiheskia, letxuga platera, patata-mina, gazta irasagarrarekin, pastela… eta saltxitxak. «Aurten euskal saltxitxak ere izango ditugu. Frankfurt erakoak, betikoak, salduko ditugu. Baina aurtengo berezitasuna bertako saltxitxena da. Zapore egokia dute garagardoarekin uztartzeko», zehaztu dute Tiñeluko kideek.
Zer edan eta jan izanda, girotze jarduerak ere jasoko ditu Karlos Saldisek. Osteguneko lehen egunean (18:30ean zabalduko dute gunea) 22:30etik musika berezia jarriko dute. Ostiraleko (hilak 27) bigarren egunean (18:00etatik izango da zabalik eremua ostiral eta larunbatean) 22:00etan Traband taldeak elektrizitatea jarriko dio aparraren festari, eta 23:00etan Lezoko Jaixkipe txarangakoek hartuko diete lekukoa. Larunbaterako beste bi txaranga Saldisen: 22:15ean Tximeletak, eta 23:30etik herriko Lau Katu.
Inork deus faltan bota ez dezan 130 boluntario lotu ditu Tiñeluk ostegunetik larunbatera lanean aritzeko. «Dena prest dugu. Orain, lezoarrak nahiz bisitariak festara etortzea besterik ez da falta», Tiñelukoen gonbita.
