Barandiaran parkearen lehen faseko lanak ostegunean hasiko dituzte
Hamar hilabete iraungo dutela lehen faseko lanek aurreikusi dute eta 2 milioi euroko inbertsioa egingo du udalak. Ondoren, urbanizazio eta hornidura faseak helduko dira.
Gaur aurkeztu dute Barandiaran parkearen lehen fasearen hasiera. Kostata, baina iritsi da. Barandiaren Parkea egi bihurtzetik gertuago da gaurtik. Pontika auzoko aisialdi eta berdegune berria izango den parkearen lanen lehen fasea abiatuko dute ostegunean. Aizpea Otaegi alkateak, Eneko del Amo Hirigintza zinegotziak, eta auzo elkarteko ordezkariak agerraldia egin dute gaur Barandiaran Parkea izango den orubearen aurrean lanen hasieraren berri emateko. Agerraldi horretara etorkizunerako bizilagunekin batera proiektatu duten parkearen irudia erakutsi dute, halaber, “bizilagunekin egindako prozesu baten bidez erabaki da parkeak zer nolako itxura izan behar duen. Parkearekin, Pekin erreka berreskuratuko da—gaur egun lur azpian estalia dago eta azalera aterako dute parkearen barruan egiten duen bidean— eta beraz, herriaren erdi-erdigunean birika berri bat zabalduko du Barandiaran parkeak. Udalerria bera eta inguruan bizi diren auzotarrentzat berdegune bat gehiago izango da, eta auzo eta herri bizigarriago bat egiteko urrats bat gehiago suposatuko du”, Otaegik azaldu duenez.
Eremua hesitzeko langak bertan dira jada, eta ostegunean jarriko dituzte. Hori horrela, Barandiaran parkea izango denaren eremuan aparkatzen duten autoek ordutik aurrera, Beraun kaleko hasierako aparkaleku berrian aparkatu beharko dute, “horretarako eraiki da hain zuzen ere aparkaleku eraikin hori, eremu hau guztia libre uzteko”, azaldu du Otaegik.
Ostegunean hasiko dena parkearen lehen fasea izango da. Hiru ditu denera alkateak esan moduan: “Lehen fase honek hamar hilabeteko iraupena izatea aurreikusi dugu, eta 2 milioi euroko inbertsioa egingo du udalak”. Lehen fasean lur mugimendu guztia egingo dute, eta geratzen diren kutsatutako lurrak erretiratuko dituzte. Lehen fase horretan parkearen beraren fisionomia agerian geldituko da; beste bi faseetan, berriz, urbanizazioa, eta hornidura egingo dituzte, hurrenez hurren.
Pozik azaldu dira Otaegi eta del Amo agerraldian, “azkenean, urte askotako bizilagunen eskaerari erantzunez, agintaldi honetan bai, parkea errealitate bihurtuta ikusiko dugu. Uste dut Pontikako auzoarentzat, eta oro har herri osoarentzat mugarri bat dela aste honetakoa, mugarri garrantzitsua”.
Espe Arangoa Iparragirre bizilaguna ere pozik, “ea azkenean parkea ikusten dugun. Egina ikusten dugunean, oso pozik izango gara bizilagun guztiak”.
