Pasaiako Irakurketa Klubean, 'Babilonia'-tik 'Dimisioa'-ra
Udalerriko liburutegiek euskarazko irakurketa klubaren barruko bederatzi saio jasoko dituzte urriaren 14an hasi, eta ekainaren 13ra arte.
Pasaiako Udal Liburutegietan berriz ere euskarazko literaturak txoko nabarmena izango du. Irakurketa Klubak urritik ekainera izango dituen batzarraldien berri eman du. Sasoiko lehena urriaren 14an egingo dute, Antxoko liburutegian Juan Mari Irigoienen Babilonia lana xehetzeari ekingo diotelako. Azken saioa 2025eko ekainaren 13an egingo dute, Trintxerpeko liburutegian, Juan Luis Zabalaren Dimisioa-rekin. Bien artean beste zazpi saio itundu dituzte euskarazko literaturaren zaleen topagunekoek.
Xabier Etxaniz Rojok gidatuko ditu solasaldiak. Idazle pasaitarrak bideratuko dituen topaketa horiek, denak, 19:45ean hasiko dira unean uneko liburutegian (behean egutegi osoa). Euskal idazleek idatzitakoak, nahiz euskara ekarritako lanak izango dira mintzagai bederatzi saio horietan. Aholkua: irakurketa taldean parte hartzeo egokiena landuko diren liburuak aurrez irakurtzea, liburu horri dagokion saioan iritziak eta ekarpenak solaskideekin eta bideratzailearekin konpartitu ahal izateko.
Klubean parte hartzea doan da. Hala, izena emateko epea zabalik dela adierazi dute. Hori egikaritzeko, edo zalantzak argitzeko, posta elektroniko bat baliatu behar dute interesdunek. Pasaiako udalak literaturaz gozatu nahi dutenei egitasmoaren bat egiteko gonbita egin die.
Jarraian, saioen programazioa.
- Urriak 14. Antxoko liburutegian, Joan Mari Irigoienen Babilonia.
- Azaroak 11. San Pedroko liburutegian, Ray Bradbury-ren Fahrenheit 451.
- Abenduak 9. Trintxerpeko liburutegian, Juan Kruz Igerabideren Begi bat kokotean.
- Urtarrilak 17. San Pedroko liburutegian, Karmele Jaioren Maitasun kapitala.
- Otsailak 10. Trintxerpeko liburutegian, Lide Hernandoren Izotz ura.
- Martxoak 10. San Pedroko liburutegian, Annie Ernauxen Emakume izoztua.
- Apirilak 14. Trintxerpeko liburutegian, Jon Alonsoren Carvallo Euskadin.
- Maiatzak 12. Donibaneko liburutegian, Garazi Arrularen Lurraz beste.
- Ekainak 13. Juan Luis Zabalaren Dimisioa.
