Seitik sei, poltsikora
Asteburuan jokatutako sei partidak irabazi dituzte Errenteria-Oreretako pilotariek. EPLEk frontoira deitu ditu herritarrak, pilotarekin gozatzera.
Abel Pichel EPLEko pilotaria. Argazkia: Gipuzkoako Euskal Pilota Federazioa Pozik dira, eta ez da gutxiagorako Errenteria-Oreretako pilotariak. Sei partida jokatu dituzte, eta seiak irabazi. Ez da ohikoa joan den asteburuan Agustina Otaola pilotalekuan bizitutakoaren antzeko egoerak gertatzea: Gipuzkoako Kluben arteko txapelketako bigarren jardunaldiko sei partidetan, sei garaipen.
Ostiraletan jokatutako partidetan, Orbegozo eta Ortiz de Urbinak 22-21 irabazi zuten Murumendiren kontra eskuz binakakoetan. Eyheramendik eta abelek 35-16 irabazi zuten Oianguren kontra, eta Eskisabelek eta Rubenek 35 eta 19 Errepalaren kontra, larruzko paletan. Gomazko paletako azken partidan, berriz, Arregik eta Aizkorrretak 25-10 irabazi zuten Aiaren kontra.
Larunbatean jokatutako partidetan garaipen gehiago etxekoentzat: M. Aranburu eta Mitxelenaren garaipena Gomazko Paletan Beotibarren kontra (25-15), eta Larrak eta Bouaskarrek 22-5 irabazi zuten Azkoitia Oteizaren aurka.
Herritarrei deia egin die, bestalde, EPLE, Errenteriako Pilotaren Lagunen Elkarteak Agustina Otaola pilotalekura gerturatu daitezen: “Astero gzoatzeko aukera dute, batez ere ostiral eta larunbatetan modalitate guztietako partidekin, esku pilota, paleta, pala motza eta gomazko paleta”. Sarrera doakoa da. Urriaren 20ko asteburutik aurrera, gainera, Kimu eta Haur errendimendu kategorietako pilotariak lehiatuko dira. Partiden karteldegia asteazkenero iragartzen du EPLEk web orrian eta sare sozialen bidez.
