Orratx! Txiki, partaide bila
Herriko antzerki taldean izena emateko aukera dute gazteenek. Hilaren 27ra arteko epea dute apuntatzeko.
2024-2025 ikasturtean antzerkiarekin herrian gozatu nahi duten haur eta gazteek ateak zabalik dituzte. Izan ere, Orratx! Txiki antzerki taldeak izena emateko epea zabalik du; hilaren 27ra arteko epea dago antzerkigintzan hasi, edo jarraitzeko. Izena Orratx!-en webgunean eman daiteke, han dagoen galdetegia beteta.
Urritik ekainera luzatuko da ikasturtea. Izena ematen dutenak bi taldetan banatuko dituzte, adinaren arabera: 11-14 adin tartekoek ostegunetan egingo dituzte entseguak, 18:30etik 20:00ak arte; gazteenak (7-10 adin tartekoak), berriz, ostiraletan bilduko dira, 17:00etatik 18:30era. Helduenak 3an hasiko dira martxan, eta gazteenak 4an.
Hileroko kuota 25 eurokoa da. Beraz, ikasturtea urritik ekainera denez, bederatzi hilabete ordaindu beharko dituzte izena ematen dutenek, 225 euro osotara. Lehen kuota ordaindu arte ez da behin betikotzat emango izen ematea. Kurtsoa hasita taldea utzi nahi dutenek, kuota guztiak ordaintzen jarraitu beharko dute.
