Oarsoaldeak Oarsolan zentroa inauguratu du
Oarsolanek Errenteria-Oreretako Lartzabal auzoan egingo du bidea, eta bere helburu nagusia da laneratzea eta kalitatezko enplegua sustatzea.
Erakundeen ordezkaritza zabala izan da inaugurazioan. Oarsoaldea Garapen Agentziak Oarsolan Enplegurako eta Inklusiorako Berrikuntza Zentroa inauguratu du gaur. Oarsolanek eskualdean laneratzeko eta kalitatezko enplegua sustatzeko erronka du, eta Errenteria-Oreretako Lartzabal auzoko 31. zenbakian egingo du bidea. Gaur egin dute egoitza berriaren inaugurazio ofiziala. Eskualdeko nahiz kanpoko ordezkaritza politiko eta ekonomiko zabala izan da bertan. Horien artean eskualdeko lau herrietako alkateak (Errenteriako alkate eta Oarsoaldea Garapen Agentziako presidente Aizpea Otaegi, Pasaiako Teo Alberro, Oiartzungo Joana Mendiburu, eta Lezoko Mikel Arruti); Eider Mendoza Gipuzkoako ahaldun nagusia; Mikel Torres bigarren lehendakariorde eta Eusko Jaurlaritzako Ekonomia, Lan eta Enplegu sailburua; Alfonso Gurpegi Eusko Jaurlaritzako Enplegu eta Gizarteratze sailburuordea; edo Ane Insausti aldundiko Ekonomia Sustatzeko eta Proiektu Estrategikoetako diputatua. Fernando Nebreda Oarsoaldearen kudeatzaileak eman zizkien azalpenak betaratutakoei.
Oarsolanen helburu nagusia da pertsona langabetuen eta bereziki ahulenen gizarteratzea eta laneratzea sustatzea, enplegura eta gizarteratzera bideratutako eragileekin lankidetzan. Zentroak laguntza integrala eskainiko die langileei, ekintzaileei eta enpresei, pertsonak ardatz hartuta. Oarsolan prest dago eskualdean eta Oarsoaldeko mugetatik harago inklusio handiagoa eta kalitatezko enplegua lortzeko aldaketaren buru izateko. Hau da, Oarsolan zentroak gizarteratze eta laneratze prozesua optimizatu nahi du, lana bilatzen ari diren pertsonen parte hartze aktiboa sustatuz eta lankidetza eta laguntza integraleko ingurune bat ezarriz.
Oarsolanek duela 31 urte hasi zuen bidea, Berpiztu proiektuaren baitan. Berpiztu Eusko Jaurlaritzak finantzatutako egitasmoa da, eta bere xedea zen eskualde behartsuak laguntzea. Plana abiatu zenean Oarsoaldeko langabezia tasa altua zen, eta nahiz eta tasa orokorrek hobera egin duten, zenbait pertsona eta talderentzako erronkek gora egin dute beren lan egoeraren konplexutasunagatik. Oarsoaldeko planak lau jarduera ildo eta 24 milioi euroko aurrekontua ditu: Badiaberri enpresaren kokalekua; berrikuntza zentro bat sortzea; enplegu plan integrala; eta inklusio saretik sortutako proiektua. Sortu zenetik, Berpiztuk “eragin positiboa” izan du Oarsoaldean enplegagarritasunaren hobekuntzan, emandako laguntzan eta enpresa berrien berrikuntzan.
Oarsolanek, gainera, Living Lab kontzeptuaren filosofia du, hau da, honakoak bultzatzen ditu: forma eta berrikuntza berriak esperimentatzen eta inplementatzen dira; eragileen arteko elkarrekintza irekia sustatzen da; pertsona bere osotasunean hartzen da; eta ikerketa-ekintzaren printzipioa aplikatzen da praktika eta hausnarketa konbinatzen diren ezagutza sortzeko eta laneratze eta ekintzailetza prozesuak etengabe hobetzeko.
Oarsolanek 9 enplegu teknikari, 2 administrari, mikroenpresetako teknikari bat, sustapeneko teknikari bat eta Patxi Arrazola zuzendaria ditu erabiltzaileen eskura. Datuei erreparatuta, urtean 1.800 langabe inguru artatzen dituzte, eta 2.500 enplegu ekintza, orientazio saio, banakako edo taldekako ikastaro eta lan laguntzako beste jarduera batzuk jartzen ditu haien eskura. Horrez gain, Oarsolanek eskualdeko langabeen %50a baina gehiago artatzen du. Jendaurreko ordutegia honakoa da: astelehenetik ostiralera 08:00etatik 14:30era.
