Atlantikaldia posible egin duten guzti-guztiei, udalaren esker ona
Jaialdiak eman duenarekin eta Errenteria-Oreretan utzi duen arrastoarekin pozik azaldu da Udala, Atlantikaldia amaitu berritan.
Indartsu. Halakoa izan da Atlantikaldiaren 11 ekitaldia udalaren arabera. Hura amaitu berritan egin du balorazioa, eta jaialdiak eman duenarekin eta Errenteria-Oreretan utzi duen arrastoarekin “oso pozik” azaldu da. Sinistuta dago udala, Atlantikaldiarekin, herritarrek topo egin eta elkar ezagutzeko molde berri bat sortu duela: “Urte hauetan guztietan zehar jaialdi formatu berri bat eraiki dugu, guztiontzako den jaialdi bat”.
Poza ere, Errenteria-Oreretan elkarrekin bizi diren askotariko komunitateak espazioak konpartitzen ikusteagatik udalak.
Aipamena erpin askori egin dio, gainera, udalak balorazio horretan. Publikoa izan da horietako bat, jaialdiaren motorra dira horiek ere, eta ahien jarrera izan du hizpide: “Bertaratzen den jendeak Atlantikaldiaz gozatu nahi du, jaialdiaren parte izan nahi du. Argi ikusten da antolatzen ditugun tailerretan, musika kontzertuetan… parte hartzaile aktibo izan nahi du publikoak, eta gertutasun hori nabaritu egiten dute artistek. Horri esker, une oso bereziak oparitzen dizkigu Atlantikaldiak”.
Jaialdiaren arrakastaren beste gako bati ere egin dio erreferentzia: “Eragileen inplikazioa aparta izan da. Guztien lanari esker kalitate handiko egitaraua osatu ahal izan dugu”.
Azkenik eguraldia izan du hizpide. Izan ere, iragarpenen mehatxua gain-gainean izan du jaialdiak aurten, eta horren harira, hainbat ekintza eta jarduera gunez aldatu behar izan zituen: “Atlantikaldia kalean gertatzen den jaialdia da eta hori bermatzeko saiakera egin dugu. Publikoak ezin hobeto erantzun du aldaketa hauen aurrean”.
Atlantikaldia posible egin dute elkarte, artista, laguntzaile, herritar, erakunde, eta kanpotik etorri diren bisitariei eskerrak eman dizkie udalak. Primizia ere eman du bukatzeko: hamabigarren ekitaldiko datak aurreratu dituzte. 2025eko irailaren 18tik 21era egingo du Kultur Topaguneak eta Musika Jaialdiak hamabigarrena.