Urriaren 1ean hasiko dute Lezoko ludotekan ikasturtea
Zerbitzua erabiltzeko izen ematea ludotekan bertan, Euskara-Kultura sailen bulegoan, edo 'online' egin daiteke.
Egun hutsik den ludoteka, haurrez beteko da urriaren 1etik aurrera. Ikasturte berriarekin martxan jarri diren zerbitzuen artean Lezoko udal ludotekarena dago. 4-12 adin tarteko haurrentzat aisia tarteak euskaraz, balioetan oinarrituta, eta parte hartzeren bidez baliatzeko azpiegitura da, astelehenetik ostiralera zabalik dena, 16:30etik 19:30era arte; hiru orduko bitarte horretan sar daitezke haurrak ludotekara. Hizkuntza errefortzuaren lanketa esplizitua egingo dute ludotekan, eta ahozkotasunari arreta berezia jarriko diote, jolastuz euskara maila aberasteko. Urriaren 1ean zabalduko ditu ateak.
Udalak jakinarazi du jada izen-emate aroa zabalik dela. Apuntatzeko hiru modu daude: bi lehenak aurrez aurrekoak dira, ludotekan bertan (16:30-19:30) eta Lezoko Udaleko Kultura-Euskara sailen bulegoetan (Donibane kalean, 08:30-13:30) eman daitekeelako izena. Hirugarrena telematikoa da, udalaren webgunea baliatuta erabil daitekeena.
Matrikula bi erara ordain daiteke. Lehena ikasturte osoko (urritik maiatza bukaera artekoa da) kuota orain ordaintzea da, 40 euro denera. Bestea, hiruhilabeteroko formula: 18na euroko hiru zati; bigarren modalitate horretan hiru hilabete kontatuko dira lehen ordainketa egiten den egunetik hasita, hurrengo bi hiruhilekoen ordainketa noiz egin kalkulatzeko.
