Udaltzain postu baterako deialdia zabaldu du Lezoko Udalak
Abenduaren 31ra arteko kontratua izango du hautatuak. Eskaerak urriaren 2ra arte (asteazkena) egin daitezke.
Lezoko Udalak udaltzain postu bat betetzeko deialdi publikoa egin du. Hautatua izaten denak, gutxienez, abenduaren 31ra arteko kontratua izango du. Deialdiaren xehetasunak eta izena emateko aukerak hemen klik eginda lor daitezke. Hautatua izango denak udaltzainen ohiko funtzioak beteko ditu, nahiz eta bitarteko kontratua eskaini: udal eraikinak zaintzea, trafikoa arautzea, larrialdiei aurre egitea, eta segurtasun arloko prebentzioan aritzea. Lanaldi osoko jarduna eskaintzen du udalak (txandakakoa, egunaren araberako ordutegiarekin), eta soldata gordina 2.822 eurokoa da.
Eskatzaileek bete beharreko baldintzen artean, honakoak nabarmenenak: Batxilergoko edo goi mailako titulua izatea; euskaraz jakitea; Polizia eta Larrialdietako Euskal Akademiako oinarrizko ikastaroa gainditu izana; B motako gidabaimena izatea; eta funtzio publikoak betetzeko desgaitua ez izatea.
Urriaren 2an (asteazkenean) bukatuko da lan deialdian izena emateko epea.
