PSE-EE: "Oarsolan, udalerrian enplegua hobetzeko funtsezko tresna da"
Zentroaren irekiera, Eusko Jaurlaritzak Errenteriaren "garapen ekonomiko eta sozialaren alde egiten duen apustua" sendotu du PSE-EEren iritzirako.
Mikel Torres Ekonomia, Lan eta Enplegu sailburua inaugurazioaren une batean. Argazkia: PSE-EE Oarsoaldea Garapen Agentziak Oarsolan Enplegurako eta Inklusiorako Berrikuntza Zentroa inauguratu zuen asteartean Eskualdean laneratzeko eta kalitatezko enplegua sustatzea du helburu Lartzabal auzoan kokatutako zentro berriak.
Oarsolanen irekieraren gaineko balorazioa egin du orain Errenteriako alderdi sozialistak. Pozik azaldu da Enplegu eta Gizarteratzeko Berrikuntza zentroarekin, izan ere, sinistuta dago Eusko Jaurlaritzak Errenteriaren garapen ekonomiko eta sozialaren alde eginda duen apustua sendotzera datorrela, “baita kolektibo ahulenentzako lan aukerak sortzeko duen konpromisoa ere”.
Udalerrian enplegua hobetzeko tresna gisa “funtsezko” zeregina izango duela zentro berriak ere esan du Isaac Palencia sozialisten eledunak komunikabideetara helarazitako prentsa oharrean: “Mikel Torres lehendakariorde eta Lan eta Enplegu sailburuari eskerrak eman nahi dizkiogu Errenteriarekin duen konpromiso sendoagatik”.
Garapen ekonomiko, enplegu eta prestakuntza politika berritzaileen aldeko apustua “funtsezkoa” dela udalerriaren etorkizunerako, gaineratu du Palenciak: “Enplegu Sailaren finantzaketari esker, udalaren enplegu planak eta Berpiztu bezalako proiektuak bultzatu ahal zian ditugu, besteak beste, langabeen prestakuntzarako laguntzak, gizarte bazterketa arriskuan dauden kolektiboentzako gizarteratze eta laneratze ekimenak, eta enpresa berriak sortzeko laguntza”.
Zentroak langile, ekintzaile eta enpresei modu integralean laguntzeko lan egingo duela esan du Palenciak azkenik, “lan merkatutik urrutien daudenak lan merkatuan sar daitezen sustatzeko eta Errenterian talentu kualifikatuaren iraunkortasuna sendotzeko”.
