Asteburu gazi-geza Iñigo Iglesiasentzat
Larunbateko lasterketan lehenengo postua egin zuen errenteriarrak Aragoiko (Espainia) Motor Land zirkuituan. Atzoko lasterketan, penalizazio batek puntuak lortzeko aukerarik gabe utzi zuen Iglesias.
Iñigo Iglesiasek larunbateko lasterketa irabazi zuen. argazkia: Dani Novas Asteburu erabakigarria zuen Iñigo Iglesias pilotuak 300 zentimetro kubiko Super Sport Motoziklismo Munduko Txapelketan goi postuetan mantentzeko. Horren jakitun borroka bizia egiteko prest heldu zen Aragoiko (Espainia) Motor Land zirkuitura ostegunean errenteriarra. Txapelketaren 13. eta 14. lasterketak jokatu dituzte bertan larunbatean eta atzo eta gazi-gozoa izan da azken emaitza Iglesiasentzat.
Larunbatean lasterketa bikaina egin zuen, hasi eta buka buruan izan zen Iglesias, baita garaipen handia lortu ere. Iglesiasek lortutako puntuak urrezkoak izan ziren larunbatean kontrario zuzenak dituen Mahendra eta Venemanekiko distantzia laburtzeko. Mahendra lehena da sailkapen orokorrean 175 punturekin, veneman bigarren, 168rekin, eta Iglesias, hirugarren 163 punturekin.
Igandean ez ziren baina nahi bezala atera gauzak. Mundukoa bukatzeko bi lasterketen faltan ez zuen punturik poltsikoratzerik izan Iglesiasek atzokoan. Bi itzuli luzeko penalizazioa ezarri zioten errenteriarrari debekatuta eremu batean pistatik ateratzeagatik, eta ez zuen astirik izan galdutako postuak berreskuratzeko.
Lasterketa ederra egiten ari zen errenteriarra, baina ez zuen atzo zorte aldeko izan. Atzokoaren ostean, aldenduago daude bere bi arerio zuzenak. Sailkapen orokorrean 195 puntu ditu azken lasterketaren ondoren Mahendrak indonesiarrak, eta 179 Veneman herbeheretarra; Iglesiasek larunbatean zuen puntu kopuru berarekin gelditu zen, 163 punturekin. Hala bada, 32 puntuko aldea atera dio sailkapen orokorrean indonesiarrak, eta 16koa herbeheretarrak.
Urriaren 18tik 20ra jokatuko dute azken lasterketa Jerez (Andaluzia, Espainia) Angel Nieto zirkuituan, eta 50 puntu daude jokoan. Ez da erraza panorama, baina ezta ezinezkoa ere eta Iglesiasen taldeak argi azaldu du pilotua “azkeneraino borrokatuko dela”, mundialaren podiumera igotzeko.
Ondoko argazki galeriara bildutako irudiak, Dani Novasek larunbatean Motor Land zirkuituan ateratakoak dira.
