"Gi-636ak hiltzen gaitu" esango dute berriz ere
Gaintxurizketako Errekalde hotelaren parean elkarretaratzea deitu dute astelehenerako, oinezkoen baldintzak hobe daitezen eskatzeko.
Abuztuaren 5ean emakume bat hil zen Gaintxurizketako auzoa zeharkatzen duen Gi-636 errepidean, auto batek harrapatuta. Ez zen lehena izan. Horrek bultzatuta, eta aurretik izan diren bestelako pertsona harrapaketa eta istripuetaz aspertuta, mobilizazio aroa iragarri zuten behingo oinezkoek errepide hori seguru gurutzatzeko neurriak har ditzaten. Bide horretan hurrengo urratsa astelehenean (urriaren 7an) emango dute, elkarretaratzea egingo baitute 18:00etan hasita Errekalde hotelaren parean. “Gi-636ak hil egiten gaitu” lelopean bilduko dira.
Bertan inguruan bizi direnak izango dira, abuztuaren 6an egin zuten elkarretaratzean izan bezala. Baina auzotik kanpokoek bertaratzeko asmorik balute, autoak non utz daitezkeen adierazi dute antolatzaileek. Hala, Salva enpresako parkina nahiz 107 poligonokoa erabil ditzatela eskatu diete ibilgailuz hara joan nahi dutenei.
