Tasen igoera orokorraren kontra egin du Lezoko EAJk
Jeltzaleek uste dute egungo gastuak ordaintzeko "baliabide nahikoak" dituela udalak, "bizilagunak gehiago kargatu gabe".
Joan den astean onartu zituzten, udalbatzarrean, 2025ko udal eta zerga ordenantza berriak. Gobernu taldearen aldeko botoekin aurrera egin zuten euren aurkeztutako aldaketa proposamenek, hainbat tasen eta zergen igoerak barnebiltzen zituztenak, eta EAJk eta PSE-EEk kontrako botoa eman zuten. Lezoko EAJk kontrako boto hori argudiatzeko arrazoiak eman ditu. Esan dute udal gobernuak igoera horiek arrazoitzeko “plangintza argi eta egokirik” ez duela aurkeztu, eta igoera horiek ez direla beharrezkoak azaldu du.
Onartu dute zaborren tasen igoera justifikatua dela, Europatik datozen araudiekin bat egiteko beharrezkoa baita. “Beste igoera batzuk, ordea, ez dute justifikazio nahikorik, eta herrian eragin ezkorra izango dute”. Tasen igoera orokorrak “hori justifikatzen duen inbertsio plan zehatzik” ez duela adierazi dute jeltzaleek, “bizilagunak gehiago kargatu beharrik gabe, egungo gastuak ordaintzeko baliabide nahikoak ditu udalak”. Kiroldegiko tasen igoerari ere erreferentzia egin dio EAJk: “Interes publikoko zerbitzua denez, udala kostuen zati bat bere gain hartu beharko lukeela uste dugu, pisu guztia erabiltzaileek helarazi beharrean”.
Elkarlanerako aukeren alde egin du Lezoko EAJk, “udalerriari benetan mesede egingo dioten adostasunak bilatzen laguntzeko eta hitz egiteko prest gaude”. Hala, epe luzerako plangintza egiteko deia egin dio udal gobernu taldeari, “Lezoko etorkizuna bultzatuko duen proiektuetan lan egiteko interesa dugu, eta udalerriaren aurrerabidean modu eraikitzailean laguntzeko prest gaude”.
