Lezoko PSE-EE: "Presio fiskala areagotzeak eragin negatiboa izango du herriko familietan"
Osteguneko udalbatzarrean hainbat udal tasa eta zerga eguneratu ziren. Horren gaineko iritzia eman du Lezoko PSE-EEk.
Ostegunean udal tasa eta zergak eguneratzeko proposamena eraman zuen udalbatzarrera udal gobernu taldeak. Euren aldeko botoekin atera zen aurrera aldaketa sorta. PSE-EEk, EAJk bezala, horien kontrako botoa eman zuen. “Presio fiskala areagotzeak eragin negatiboa izango du herriko familietan”, adierazi du Joxean Sanchez sozialisten eledunak. Sanchezen esanetan, “gehiegizko bilketa izaera” du udal gobernuak aurrera atera duen neurri sortak. Aldi berean, EH Bilduren proposamena aztertu eta zuzenketak aurkezteko denbora falta izan dutela kritikatu du Sanchezek. Sanchezen ustez, “gobernu taldeak proposatutako zerga eta tasen igoerek ez dute hobekuntzarik ekarriko funtsezko zerbitzu publikoetan, hala nola, bideen garbiketan, berdeguneen eta kirol-instalazioen mantentzean, baizik eta plangintza eta kudeaketa ekonomiko txarraren ondorio dira”.
Zaborren tasaren igoerari dagokionez, PSE-EEk onartu du legedia betetzeko adinako neurria dela. “Hala ere, udal gobernua legea betetzera mugatzen da, gaikako bilketa hobetzeko neurriak proposatu gabe, eta tarifak indibidualizatzeko aukera ematen duten sistemak ezarri gabe”. Sanchezen iritziz, udal gobernuaren ·betebeharra” da zaborraren tasaren igoera horri alternatibak bilatzea, “igoera horiek beti ez dituztelako zerbitzu hobeak ekartzen, eta familien ekonomia gehiago estutzeko baino ez dute balioko”. Horren aurrean, bizilagunak zaborren tasaren gehikuntzatik babesteko “salbuespenak, murrizketak eta hobariak aplikatzea” azter daitezela eskatu diot udal gobernuari, “hala nola edukiontzi adimenduen bidez, edukiontzi marroia erabiltzeagatik hobari bat ezartzea, edo komunitateko konpostaren erabiltzaileentzako hobariak handitzea, udalerri mugakideetan dauden bezala”.
Kirol instalazioen tasen igoeraren gaineko iritzia ere eman du Lezoko PSE-EEk: “Gehiegizkoa eta justifikaezina iruditzen zaigu”. Uste dute igoerak ez diola erantzuten zerbitzuaren hobekuntzari, nahiz instalazioak egoki mantentzeari, “zerbitzuren kostu errealei lotutako aldaketa beharko luke izan. Espero dugu igoera horrekin abonatuen kopurua ez jaistea, horrek lezoarren eta erabiltzaileen bizi kalitatean eragina izango lukeelako”.
Etxebizitza hutsei OHZn %100eko errekargua ezartzeari dagokionez, Lezoko PSE-EEk horren ordez metro koadro erabilgarriko 10 euroko kanona ezartzear nahiko luke. “Kanon hori % 10 handituko litzateke okupatu gabeko urte bakoitzeko, eta horren bilketa udalerriko etxebizitza-politiketara bideratuko litzateke. Kanon hori osatzeko, hainbat zerga jaitsi daitezke, hala nola eraikuntzen, instalazioen eta obren gaineko zerga, etxebizitza publikoen eraikuntza errazteko”.
