Sortu: "Orduan ametsa zena, gaur sekula baino errealagoa da"
Euskal Herri independente, sozialista, feminista eta euskalduna lortu arte borrokan jarraitzeko konpromisoa berretsi du Sortuk, Txiki eta Otaegi oroitzeko ostiraleko ekitaldian.
Txiki eta Oategi oroitzeko ekitaldia, ostiralean. Argazkia: Sortu Joan den ostiralean 49 urte bete ziren Juan Paredes Manot Txiki eta Angel Otaegi Etxeberria ETAko kideak fusilatu zituztela. Data gogoan hartuta Txiki eta Otaegi oroitu zituen Sortuk. Fusilamendu haiekin, frankismoak Euskal Herriaren askatasunaren ametsa “galbidera” eramatea zuela helburu nabarmendu zuen Sortuk Foru Plazan egindako ekitaldi politikoan, baina oker zebiltzala, “orduan ametsa zena, gaur sekula baino errealagoa da. Askatasun haizeari mugarik jartzerik ez dago. Txiki eta Otaegirekin batera, Euskal Herriaren alde askotariko ekarpena eginez borrokatu diren herrikide guztiak oroitzen ditugu gaur”.
Euskal herriaren aldeko konpromisoa berretsi zuen halaber, “Euskal Herri independente, sozialista, feminista, eta euskalduna lortu arte borrokan jarraitzeko konpromisoa berresten dugu”.
Faxismoari ere aipamena ekitaldi horretan, “eskuin muturreko indarren aurkako borrokan segitzen dugu, instituzioetan zein kalean”.
Datorren lau urtekoari ere begirada egin zion sortuk ostiraleko ekitaldian, eta “erronkak” ez direla “makalak” izango nabarmen jarrita, banan bana zerrendatu zituen. Horrela, preso, iheslari eta deportatu guztiak etxera ekarri arte lanean segitzeko deia egin zuen, eta Espainiako Estatuaren biktimak aitortzeko lehen urratsak ematen hasiak direla jakinarazita, zabaldutako bide horretan aurrera egin beharra azpimarratu. Joera eta jarrera erreakzionarioei ere aipamena ostiraleko ekitaldian: “Horiei aurre egiten segi beharko dugu, euskararen aurkako erasoei, arrazakeriari, feminismoaren aurkako oldarraldiari, eta oro har eskuin muturraren agendari esparru guztietatik”.
Aldi berean, herri erronkei “erantzun positiboak” ematen asmatzea jarri zuen erdigunean: “osasungintzan, migrazioan, etxebizitza eskubidearen alde, eta trantsizio ekosozial justuaren alde esate baterako”.
Azken erronka gisa, aldaketaren aldeko “haizea” hauspotzen jarraitzea jarri zuen: “Bizitzak erdigunean izango dituen Euskal Herri askerako bidean sakontzea da gure erronka nagusia ikasturte honetan. Badakigu nola: nazio bulkada eta bulkada soziala hauspotuz, herrigintzan arituz, balioen eraldaketa bultzatuz, eta ezker independentismoa indartuz. Euskal Errepublikaren bezperatan egon gaitezke”.
