Prekarietatearekin bukatzeko eskatu dute
Elkarretaratzea egin dute Lodosan lan istripuan zendutako garraiolariaren heriotza. Aurten lan istripuan hildako hamargarren garraiolaria izan da Errenteria-Oreretakoa.
Elkarretaratzea egin zuten garraiolariaren lan heriotza salatzeko atzo. argazkia: Olaia Matxain Errenteria-Oreretako garraiolari bat hil zen joan den ostegunean Lodosan izandako lan istripuan. Heriotza hori salatu zuten atzo arratsaldean hainbat herritarrek egindako deialdiarekin Herriko Plazan. Prekarietatea jarri zuten erdi-erdian bildutakoek, aurten lan istripuetan Euskal Herrian hil diren 43 langileen heriotzen atzean aldagai hori dagoen zalantzarik ez baitute. Hildako horietatik hamar, garraiolariak ziren.
Garraio sektorean istripuen intzidentzia altua jarri zuten agerian atzoko protestan, eta hori horrela izateko hainbat faktore direla zehaztu: “Bada guztiei gailentzen zaien arrazoi bat: prekarietatea. Gero eta hedatuagoa dago sektorean”. Prekarietate horren erakusgarri, sektore horretako langileek dituzten lan baldintzak jarri zituzten, “lanaldi luzeak, estresa, presioak, garraioagatik ordaintzen dute n prezio baxua, lan baldintzen eraginez modu osasuntsuan elikatzeko zailtasunak… Horrek guztiak istripuak izateko aukerak areagotzen ditu, eta era berean, arazo kardiobaskularrak eragiteko baldintza asko-asko biltzen, azken kasu honetakoa bezalako emaitzekin”.
Argi dute garraioaren sektorean gertatzen diren lan istripu gehienak ekidin daitezkeela, hala esan dute, “borondate politikoa baino ez da behar garraiolarien lan eskubideak bermatu eta errespetatzeko neurriak jartzeko, baita erakunde publiko eta enpresa guztien inplikazioa ere”.
Hori horrrela prekarietatearekin bukatzeko galdegin zuten protestara bildutako herritarrek: “Patronalaren inpunitatearekin bukatu behar da, erakundeek ezin dute beste alde batera begiratzen jarraitu, bestela, gertatutako denaren konplize izango baitira”.
