Antxoko festei bultzada emateko, jai batzorde berezia asteartean
San Fermin Txikien balorazioa egin, eta aurrera begira jarriko dira. Batzordearen araudi berria bozkatuko dute. Inplikazioa eskatu diete antxotarrei.
Sanferminetako txupinazoko irudia. Antxoko Jai Batzordeak batzarra egingo du hilaren 8an (asteartea), 19:30ean hasita, Kultur Etxean. Hiru gai nagusi izango dituzte aztertzeko. Bik propio festekin harreman zuzena dute; eta hirugarrenak aurrerantzean festak egin ahal izateko proposamen batekin, barrutiko festei bultzada emateko asmoz. Antxotarrei ager daitezela eskatu diete: “Jai Batzordeak adin eta baldintza guztietako antxotarren inplikazio eta babes handiagoa eskatzen dugu, deialdian jorratuko diren gaien garrantzia ikusita”, esan dute batzordeko ordezkariek.
Hasteko, Antxoko Jai Batzordeak pasatako gai ordenaren arabera, joan den asteburuko San Fermin Txikien balorazioa egingo dute. Ondoren, aurrera begira herrian zer antolatu aterako dute mahaiaren gainera, zehazki udazkeneko jaien zein Eguberritakoen programazioaren gainean ariko dira.
Azkenik, batzordearen beraren barne funtzionamendurako araudi berri baten proposamena aztertzen eta eztabaidatzen hasiko dira. Araudia bozkatzea ere aurreikusi dute. “Araudi horren garrantzia dela eta, funtsezkotzat jotzen da barrutiko tokiko gizarte-lagin adierazgarri batek parte hartzea, festetako jardueren programazioan aktiboki parte hartu nahi duten kultura eragileak, merkataritza establezimenduak eta bestelako gizarte ordezkariak barne”, egin dute dei batzordekideek. Batzordean herritarren partaidetza behar baitute, euren jatorria eta eragite esparrua edozein dela ere, “zenbat eta eragile gehiagok parte hartu, orduan eta hobeto”.
Parte hartze hori Antxoko festen onurarako izango dela uste du barrutiko jai giroko jarduerak antolatzeaz arduratzen den elkarguneak, eta nabarmendu du jai eredu herrikoi, euskaldun, integratzaile eta belaunaldien arteko partaidetzaren aldeko apustua egina duela, eta horretan sakontzen jarraitu nahi dutela. “Hala ere, ezin izango da proiektua behar bezala gauzatu barrutiaren argazki sozialari leialak izan nahirik, tokiko eragileen inplikazio eta lankidetzarik gabe”.
