"Zeren zain zaudete?"
Gaintxurizketako biztanleek kontuak eskatu dizkiete Gi-636 errepidearen gainean ardurak dituztenei. Ez dute hildako gehiagorik nahi, eta hori horrela izan dadin intentzioak baino, egitateak eskatu dituzte.
Isilik, baina ozen. Herrigunetik at, baina erdigunean. Haserre, baina soluziorako desioarekin eta esperantzarekin. Gaintxurizketako auzokideek, lezoarrek eta inguruko herrietako biztanleek elkarretaratze isilean esan dute gaur arratsaldean Gi-636 errepidean ez dutela hildako gehiagorik nahi, eta erdigunean jarri dute horretarako bidea pasabide bat egitea dela, baita oinezkoentzako korridorea ere auzoa saretzeko, eta istripu gehiago, hildako gehiago ekiditeko. Errepide ondoko zuhaitzetan jarrita dauden xingola beltzak behin betiko kentzeko. “Abuztuko kontzentraziotik gauzak egoera beretsuan daude. Auzoa ahaztuta dago. Norbaitek mugitu behar du. Horregatik gaude hemen”, esan dute auzokideen eledun izan direnek.”Gi-636ak hiltzen gaitu”, berretsi dute; “Gaintxurizketa irisgarria orain”, eskatu dute; “Hamaika dira errepide honek lapurtu dizkigun bizitzak”, esan dute, bihozminez.
“Orain da garaia”, ziurtatu dute. Gaintxurizketako bizilagunek badakite asteazkenean Gipuzkoako Batzar Nagusietan eztabaidagai izango dutela Gi-636 errepidean gertatzen ari dena. Gertatzen dena baino, gertatu behar ez zenari soluzioa bideratzea izango litzateke, bizilagunen ustez, asteazkeneko herrialdeko hautetsien mahai nagusiko politikariek aztertu beharko luketena: “Bi hilabete dira jada azken istriputik. Berta gure auzokidea auto batek eraman zuenetik. Bi hilabete geroago, ordea, oinezkook kotxeak saihestuz jarraitzen dugu bidea gurutzatzen. Bada hogei minutuz itxaroten duenik ere ditxosozko errepide honen hamar metroak gurutzatzeko. Bizikletan dabiltzanek ere bizitza jokoan jartzen jarraitzen dute ertzik ez duen errepide honetan”. Irmo defendatu dute haien desioa. Dozenaka eta dozenaka izan dira Errekalde hotelaren atariko zabalgunean bildu direnak, asko eta asko, ehunka agian. Pankartak erraldoiak ziren, oso handiak eta lelo esplizituekin. Letra eta zenbaki handiak ere plastiko zatietan. Handiak, badaezpada baten batek ezikusiarena egin nahiko balu. Izan dira ezikusiarena egin baino, sinpleki agertu ez direnak ere.
Egunero bizi dutenaren trazak eman dituzte gaintxurizketarrek gaur prentsaren aurrean. Haien momentua da, badakite; herrialdea (hedabideak, politikariak, hurbileko eta urrunagoko herritarrak…) aste honetan auzora begira daude. Presioa egin nahi dute, asper-asper eginda daudelako. “Gauza polit asko entzun ditugu, baina inongo aldaketarik ikusi gabe jarraitzen dugu. Urriaren 9a izango omen da eguna”, jarraitu dute auzokideek euren aldarrikapenarekin. Etzi (asteazkenean) PPren ekimenez landuko baitute bertako errepidearen segurtasun ezaren gaia gipuzkoarrek hautatu dituztenen ganberan; PPko ordezkaririk ez zen gaur Gaintxurizketan.
Ezikusiarena gehiago ez egitea. Hori eskatu diete alderdi politikoetako kideei. Asteazkeneko bilkura, edo aurretik egin dituzten guztiek balio dezatela istripu eta hildako gehiagorik izan ez dadin auzoan, euren etxe ondoan. Lezon. “Benetako konponbideak eta berehalakoak nahi ditugu. Ezinbestekoak dira beste bizitza bat bera ere gal ez dezagun”. Zeren zain dauden galdetu diete politikoei, gaian eragin dezaketen hautetsiei. “Zeren zain zaudete? Edozein momentutan norbait despistatu eta beste hilotz bat izateko arriskua bene-benetakoa da. Eta orduan zer? Istripuaren erantzukizuna pertsonen gain jartzen jarraituko duzue?”.
Handia izan da elkarretaratzea. Auzokideak eta herritarrak izan dira protagonista, haien eskaerak izan dira erdigunean. Baina parte hartzaileen artean izan dira politikariak ere bai, tartean Mikel Arruti Lezoko alkatea (EH Bildu) eta Joxean Sanchez PSE-EEren udal eleduna. Gipuzkoako Batzar Nagusietako ordezkaritza ere izan da, EH Bilduko, PSE-EEko eta Elkarrekin Podemoseko kideena zehazki.
Elkarretaratzea bitartean ehunka auto, dozenaka kamioi, beste hainbeste txirrindulari, bi topo, beste bi tren pasa dira mobilizazioan zirenek aurretik. Ibilgailu askoren jabeek klaxona jo dute, babesa azaldu diete bertan zirenei. Topo batek ere turuta luze jo du. Elkarretaratzea bukatzeko txalo zaparrada luzeari ekin diote partaide denek. Horien artean ziren, parte hartzen eta txalotzen, azken hilabeteetan hil egin diren bi auzotarren senide, lagun eta ikaskideak.
