Rosario Percaz Juanenak, mende bat soinean
Larunbatean bete zituen 100 urte errenteriarrak. Hogeita hiru urterekin heldu zen udalerrira Astitz herritik.
Rosario Percaz Juanena 100 urte bete ditu Rosario Percaz Juanenak. Larunbatean izan zuen urtebetetzea eta familiarekin ospatzeko aukera izna zuen. Lekunberri ondoan dagoen Astitz (Nafarroa) herriko Mitxelena baserrian jaio zen 1924ko urriaren 5ean, hamabost anai-arreben familian; hamargarren zen bera. Senideek azaldu dutenez, bizitza gogorra bazen ere garai hartan, haurtzaro eta gaztaro zoriontsuak izan zituen Percazek: “Eskolak jasotzen zituen Astizko eskolan eta baserriko lanetan lagundu”.
Hogeita hiru urterekin Astitz utzi eta Errenteria-Oreretara etorri zen bizitzera, Atalluko Bartolome Huarterekin ezkonduta: “Hiru seme-alaba izan zituen, zortzi biloba eta hamabost birbiloba. Beretzat familia oso garrantzitsua izan da”, esan dute haren senideek. Ausarta eta ekintzailea halakoa izan da Percaz; oso gazte alargun gelditu eta senarrak Irun kalean zuen kotxeen alokairuko enpresa bere gain hartu zuen—Huarte, gidaririk gabeko auto alokairua—, eta aurrera atera, garai horretan emakumeentzat ohikoa ez zen ofizio bat.
Senideek argi esan dute “bizitza gozatzen jakin izan duela, eta lagunekin kafetxoa hartzeaz gain, antzerkia, zinema, eta bidaiatzea oso gustuko izan dituela beti”. Lasai bizi da orain, familiarekin batera. Zorionak, Rosario!
