Hemen da bigarren Muxikatua
Bertso musikatuen sariketaren bigarren ekitaldia prest du Piztu Lezok. Kanporaketak hilaren 18an eta 25ean izango dira, eta finala azaroaren 15ean.
Iazko saioetako batekoa da ondoko irudia. Piztu Lezo / Instagram Hemen da Piztu Lezoren Muxikatua II. Bertso Sariketa. Iazkoak arrastoa utzi, eta aurten ere egitasmoarekin aurrera egitea erabaki dute. Bertso musikatuen sariketa da, “errima bihurriekin jolasean eta musikarekin dantzan” ariko dira bertan izango diren zortzi bertsolari eta musikariak, herriko eragilekoek adierazi dutenez. “Bertsoa herrira ekarri nahi dugu, egunerokoak ibili ohi garen tokietara, lezoar ororen belarrira”, zehaztu dute.
Hiru saio izango dira bigarren Muxikatuaren barruan. Lehen biak, launa bertsolarirekin, finalerdi traza izango dute. Hirugarren eta azkena finala da, aurreko bi saioetako bakoitzean hoberen aritu diren bi bertsolariekin. “Lagun giroko sariketa da, eta zerikusi gutxi izango du saio eta txapelketa serio eta lehiakorrekin”. Hala, bi kanporaketetako epaimahaiko kideak, publikoan izango direnak izango dira. Ikusleek demokrazia ariketa egingo dute haien ustez onenak izango direnen alde bozkatzeko. Finalean ere epaile lanak egingo dituzte ikus-entzuleek, haiek erabakiko dute bigarren txapela nori eman.
Kanporaketak hilaren 18an eta 25ean izango dira. Finala, berriz, azaroaren 15ean. Ondoko koadroan, saio guztien xehetasunak.
- Lehen kanporaketa. Urriaren 18an (ostirala), 22:00etan, Tiñelu tabernan. Partaideak: Irantzu Idoate, Aissa Intxausti, Sarai Robles eta Eli Zaldua.
- Bigarren kanporaketa. Urriaren 25ean (ostirala), 22:00etan, Ibai-Ondon. Partaideak: Maider Arregi, Andoni Rekondo, Aitor Tatiegi eta Maddi Ane Txoperena.
- Finala. Azaroaren 15ean, Txerrimuñon. Bi kanporaketetan lehen bi postuetan gelditu direnek parte hartuko dute. Festa kutsuko saioa izango da.
- Musikariak: saioetan, bertsoen lagungarri musika jartzen, ondokoak izango dira: Aner Euzkitze, Libe Goenaga eta Ander Garaiar.
