Urteko bosgarren hilketa matxista salatu dute
Asteazkenean gizon batek emakume bat hil zuen Iruñean. Mugimendu feministak hilketa matxista horri ere aurre egin dio.
Asteazkenean gizon batek 20 urteko emakume bat hil zuen, labankadaka, Iruñean. Euskal Herrian 2024an indarkeria matxistak hil duen bosgarren emakumea izan zen. Horren aurrean, salaketa elkarretaratzeak egin zituzten Errenteria-Oreretan eta Oiartzunen atzo (ostirala) arratsean, tokian tokiko mugimendu feministak deitutakoak. “Urteak daramatzagu salatzen indarkeria matxista egungo sistema heteropatriarkal, kapitalista, arrazista eta koloniala sostengatzen duen egiturazko arazo politiko eta sozial larria dela”, esan zuten elkarretaratzearen deitzaileek. Hildakoaren senide, lagun eta gertukoei elkartasun eta babes osoa adierazi zieten.
Indarkeria matxistak hamaika forma dituela oroitarazi zuten atzoko mobilizazioetan, eta legedi aldetik horri aurre egiteko hutsuneak daudela, “horregatik, mugimendu feministak ez du biolentzia matxista bikote harreman afektiboen ondorio bezala soilik ulertzen. Emakumeak, emakume izateagatik soilik erailtzen gaituzte”. Hala, “jarrera konplizeak” alboratzea eskatu du mugimendu feministak, indarkeria matxistari dagokion tamainako dimentsio politiko eta soziala ematea galdegin du, eta erakundeen “pasibotasuna” nahiz jendartearen konplizitatea deitoratu ditu, “urtez urte, emakumeen kontrako erasoak gorantz doaz”.
Autodefentsa feministarako deia egin dute Bizitzaren aldeko “apustu erradikala” berretsi dute, “antokakuntza eta autodefentsa feminista dira gure tresna eraginkorrenak. Denak aske izan arte elkarrekin martxan eta borrokan jarraituko dugu”.
