KZgunea Torrekuara lekualdatuko dute bihartik
Teknologia libreak eta ekonomia soziala bultzatzea helburu duen TEKS bertan kokatuta dago, eta beheko solairuan KZgunea kokatuta, Torrekua teknologientzako erreferentzi bilakatzea du helburu udalak.
Torrekua eraikina. Bertan kokatuta dago Humanitate Digitalen Ikerketa Zentroa. KZguneak Torrekuan zabalduko ditu ateak bihar arratsaldean. Horrenbestez, Olibeteko egoitza utzi eta aurrerantzean Orereta Kalearen 7. zenbakian emango du zerbitzua. Lekualdaketa eginda, ohiko ordutegian ariko da, goizez eta arratsaldez, astelehenetik ostiralera 09:00etatik 13:00etara, eta 16:00etatik 20:00etara.
Torrekuan kokatuta dago teknologia libreak eta ekonomia soziala bultzatzea helburu duen TEKs elkarteak. KZgunea beheko solairuan kokatuta, espazioa teknologientzako erreferentzia bilakatzea du helburu udalak. Zentzu horretan lehenengo, bigarren eta hirugarren solairuetan teknologiekin zerikusia duten enpresa kooperatibak kokatzeak, eta beheko solairuan KZgunea bezalako espazio bat jartzeak, sinergia berriak garatzeko aukera sortzen dela dio udalak, “Torrekua gunea herritarren burujabetza teknologikorako erreferentzia gune bihurtzeko estrategia indartuko da”.
Zerbitzuaren kokapen berria Errenteriako Udala eta Eusko Jaurlaritzaren arteko elkarlanaren emaitza da. KZgunea IKTeetan (Informazio eta Komunikazio Teknologiak) trebatzeko zentroen sare publikoa da, Eusko Jaurlaritzak gainbegiratutakoa. Halaber, Euskadi 2025 Eraldaketa Digitalerako Estrategiaren (EEDE 2025) parte da.
Jarduera nagusia herritarra teknologia berrietan trebatzea da. Horretarako, iakstaroak, hitzaldiak, eta tutoretzak eskaintzen ditu, aurrez aurre zein online. Prestakuntza zerbitzuekin batera, informatika ezagutzak egiaztatzeko aukera eskaintzen du IT Txartela ziurtagiri sistemaren bidez, eta BakQ eta Metaposta izapidetze zerbitzuak ere.
