Landa eremuko zuhaiztien mantenu egokia eskatu dute
Adar eta zuhaitzen erorketa maiz gertatzen dela esan dute Zamalbide-Aldura inguruan, eta neurriak eskatu erakunde eskudunei irtenbide egoki bat aurkitzeko.
Bizilagun bat bide publikora eroritako zuhaitz bat motozerrarekin mozten Alduran, bidea libre uzteko. Kirk ekaitz gogorraren ondorioak pairatu zituzten hainbat herritarrek joan den astean. Hirigunean hainbat etxadi argirik gabe gelditu ziren adar bat argindar kablearen gainera erorita. Kalteak hirigunean, baita Errenteria-Oreretako landa eremuan ere. Zamalbide-Alduran bizi den Patxi Azpiazuk hala azaldu du, eta kezka azaldu du herritarrak Zamalbide-Aldura inguruan bizi direnen egoerarekin, “Kirk ekaitzak kalteak eragin ditu, baina urteak daramagu zuhaitzen eta adarren erorketen ondorioak pairatzen”.
Egoera horren atzean, “mantenu falta” eta “azpiegitura eskasa” jarri ditu Azpiazuk: “Adar eta zuhaitzen erorketa maiz gertatzen da gure inguruan, gure segurtasuna arriskuan jarriz, eta elektrizitatea bezalako oinarrizko zerbitzuak kaltetuz”.
Erakunde eskudunei “hainbat eskaera” egin dizkietela erantsi du bizilagunak, “egoera, baina, ez da hobetu. Peritu batek egindako txosten batek eta epai batek erakutsi dute, gainera, zuhaiztien mantenuan arduragabekeria izan dela”. Berak bizitutakoari erreparatu dio, bestalde, eta 2019an udal jabetzarena zen zuhaitz bat bere jabetzaren gainera erori zela eta haren iturburua “larri” kaltetu, “uraren hornidura arriskuan jarri zidan gertaerak. Gestioak egin baditut ere, ez dit inork irtenbiderik eman”.
Azpiazuren hitzetan ez da “onargarria” landa eremuko herritarrek bizi duten egoera hori, “gure oinarrizko eskubideak urratzen ditu”. Hori horrela, eskaera zehatza egin die ardura duten instituzioei bizilagunak, “landa eremuan bizi garen herritarron segurtasuna berma dezaten neurri bereziak har ditzala eskatzen diet”. Besteak beste zuhaitzak kimatu, zuhaitz eta adarren erorketek eragindako kalteak konpondu eta bere kasuan, edateko uraren hornidura bermatzea.
Ondoko argazkiak Patxi Azpiazuk bidaliotakoak dira. Kirk ekaitzak eragindako kalteen ondorioz, eroritako zuhaitzak mozten aritu dira bizilagunak bideak garbitzeko.
