Bi plaza berri, Beraun kalean
Proiektu horretako mugarri garrantzitsuenetako bat zen 5 eta 15 zenbakien artean bi plaza berri sortzea, eta gaur zabaldu dituzte ofizialki, Aizpea Otaegi alkateak, Eneko del Amo Hirigintza zinegotziak, eta bizilagunek.
Beraungo plaza berriak ireki dituzte. Aurrera doa Beraun kalearen berroneratzea. Proiektu horretako mugarri garrantzitsuenetako bat zen 5 eta 15 zenbakien artean bi plaza berri sortzea, eta gaur zabaldu dituzte ofizialki, Aizpea Otaegi alkateak eta Eneko del Amo Hirigintza zinegotziak, eta bizilagunek. Lanak bukatuta 1.500 metro koadrotik gorako egonlekuaz gozatu ahal izango dute, 0-3 urte arteko haurrentzako jolas eremu berriarekin, eta bertako landareriarekin. Esku hartze horrekin hiri espazio bat erabat eraldatu dute, bizigarriagoa izan dadin.
Bizilagunak “pozik” agertu dira emaitzarekin. Zamalanetarako espazioa egokitzea falta dela esana du Aizpea Otaegi alkateak, “zamalanetarako, erosketak eta mugikortasun arazoak dituzten pertsonak atarietatik gertuago jaitsi ahal izateko eremua egokitzea falta da, eta aurreikusia dago egitea”.
“Egindako lanek eta sortutako espazio berriak, bizia eman dio inguru guztiari” esan dute bizilagunek, asebete, “balkoira aterata autoen kea zuzen-zuzenean irentsi dugu orain arte, balkoi azpian genituelako aparkalekuak, orain parkea eta egoteko espazioa ditugu. Berroneratzea oso ona izan da, eta ikaragarria da haurrek bere espazioa izatea hemen. Asko irabazi du eremuak”.
Zamalanetarako espazioa jartzearekin batera, berdeguneetan ere arbolak jarriko ditu udalak, gereziondoak zehazki-. Azaroan izango dela hori azaldu du alkateak, “orduan delako garai egokia landaketarako”.
Udalak 854.397 euroko inbertsioa egin du.
Hiru fasetan egindako berroneratzea
2022 urte amaieran hasi zituen kale hori biziberritzeko lanak udalak, hiru fasetan planifikatuta. Lehenengo fasean 63 ibilgailurentzako aparkaleku berria sortu zuen udalak, Pontikako aparkaleku berriaren osagarri, “horri esker plazak sortu ahal izan ziren. Txakurrentzako parkea ere birkokatu da, eta gune berde bat libratu eta egokitu. Horri esker, eremu horretan ere haurrentzako eta adinekoentzat jolasak jarri ahal izango dira”.
Pontikaren ondoan aparkalekua egin ondoren, kalearen beheko aldea urbanitzatu du udalak, eta herriko bidegorri sarea ere handitu da. Halaber, lehen fasean, saneamendu eta euri uren sarean esku hartze garrantzitsuak egin ditu udalak Otaegik azaldu duenez.
Bigarren fasean gaur zabaldutako bi plazez gain, autobidearen azpiko tunelean ere esku hartu du udalak, “seguruagoa eta ibilgarriagoa izan dadin”.
Hirugarren eta azken fasea gelditzen da orain lanak bukatzeko, eta horren barruan, irisgarritasuna hobetzeko beharrezko lanak egingo dituzte kale osoan, “espaloiei jarraitasuna emanez eta handituz, eta ibilgailuen abiadura murrizteko neurriak hartu oinezkoen mugikortasuna seguruagoa izan dadin”.
Lan horiek esleipen fasean daude, eta urte amaieran hastea aurreikusi dute udal ordezkariek.
