Euskara eta identitatea, hizpide euskaltegietan
Oarsoaldeko sei euskaltegietako ikasleek 'Euskarara barne eta kanpo bidaia. Bizitza bat' izeneko solasaldi-tailerrak egingo dituzte hilaren 22tik azaroaren 5era bitartean, Jon Maia sortzailearekin.
Oarsoaldeko euskaltegietako ikasleek euskararen eta identitatearen inguruan hausnartzeko aukera izango dute Jon Maia sortzailearekin. Horretarako, Euskarara barne eta kanpo bidaia. Bizitza bat izeneko solasaldi-tailerrak egingo dituzte hilaren 22tik azaroaren 5era bitartean, eskualdeko sei euskaltegietan.
Ikasturtero sei gai jorratzen dira Oarsoaldeko Euskara Batzordearen Mintzagun programako tailerretan. Gai bakoitzarekin tailer bana egiten da eskualdeko sei euskaltegietan. Saio horiek ordu eta erdiko iraupena izaten dute, eta horien helburua da gai erakargarri, berri eta gaurkotasunekoak euskaraz eskaintzea. Horrez gain, egitasmoaren beste helburu nagusi batzuk dira edozein gai euskaraz jorra daitekeela eta ikasleak ulertzeko gai direla ohartaraztea..
- Hilak 22: Errenteriako Udal Euskaltegia, 18:30etik 20:00etara.
- Hilak 23: Pasai Antxoko Txirrita AEK, 09:30etik 11:00etara.
- Hilak 24: Errenteria-Oreretako Xenpelar AEK, 09:30etik 11:00etara.
- Hilak 29: Pasaiako Udal Euskaltegia, 09:30etik 11:00etara.
- Hilak 29: Lezoko Oroitzene AEK, 18:00etatik 19:30era.
- Azaroak 5: Oiartzungo Intxixu AEK, 19:00etatik 20:30era.
