Izaera amateurra, baina emaitza profesionala
Antzerki talde amateurren jardunaldiak egingo dituzte Lezon hilaren 25etik 27ra. Lau emanaldi izango dira, baita gogoetarako saio bat ere. Konpainia txikien lanari balioa eman nahi diote.
San Pedroko Aleka taldekoen saioa hilaren 26an izango da. Argazkia: Aleka. Antzerki Ametsetan izenburupean antzerki talde amateurren jardunaldiak egingo dituzte Lezon hilaren 25etik 27ra. Lau antzerki saiok osatzen dute topagunearen mamia (ondoko koadroan daude), baina gogoetarako astia ere izanen da. Jardunaldien antolaketan dabilen Lierni Fresneda Orratx! Antzerki Taldeko kideak adierazi duenez, hausnarketa nahia ez da berria: «Euskal Herriko herri txiki askotan, talde amateurrak daude. Sare handi bat dago. Sorkuntzez gain, beste hainbat jarduera antolatzen ditugu: haurrentzako tailerrak, jaialdiak, ikerketa historikoa egiten dira horiek antzerkira eramateko, itzulpenak… Finean, herri kultura elikatzen dugu».
Euskal Herriko kulturaren munduan talde amateurrak ikusarazteko neurriak hartu behar direla uste du Fresnedak. Bide horretan, tokian tokiko taldeek euren herrietan egiten dituzten emanaldiez gain, kanpora ateratzeko aukerak nahi dituzte, «gure leku txiki hori hartu nahi dugu zirkuituak zabalduz». Horregatik antolatu dituzte herriko jardunaldiak: «Errealitate asko daude talde amateurretan. Baina baditugu batzen gaituzten gaiak. Hori paperaren gainean jarri nahi dugu».
Fresnedak aipatu du Orratx! Lezon entzuna sentitzen dela. Besteak beste, udalaren laguntza dutelako. «Baina beste herri batzuetan ez da hori gertatzen. Gure lanari, orokorrean, balioa eman nahi diogu. Talde asko ilusio handiarekin ari dira lanean, baina egoera prekarioan».
Antzerkia, errotua
Urtaro bakoitzeko udalaren kultur programazioaren barruan asko dira antzerki obrak. Berriki, gainera, Antzerki Testu Laburren II. Lehiaketa egin da herrian. Orratx! ere osasun onean da. Horri lotuta, Fresnedak penaz aipatu du haur eta gazteen taldeetan izena emandako hainbatek ez dutela plazarik lortu, toki faltagatik: «Sei haur gelditu dira kanpoan. Badaude oraindik ere herri mailan gauzak lantzeko. Udalaren laguntza badugu, baina laguntza handiagoarekin, askoz gehiago egin genezake. Ideia asko ditugu, eta potentzial handia dago Lezon».
Jardunaldien. barruko saioetara gerturatzeko eskatu die herritarrei Orratx!-ekoak. Dibertsioa eta gozamena ziurtatu ditu. «Proposamen oso ezberdin, dibertigarri eta interesgarriak ikusiko ditugu. Antzeki amateurra ere kalitate handikoa dela ikusiko da». Gainera, herrira etorriko diren taldeetan emakume asko daudela azaldu du, «hiru egun eder izango dira».
Hilak 25, ostirala
- 19:30: Donostiako Zurriola antzerki taldearen Bernarda klownaren etxea, Gezala Auditoriumean.
Hilak 26, larunbata
- 11:30: Antzerki jardunaldietan dauden taldeen arteko mahai-ingurua, Gezala Auditoriumean.
- 19:30: Pasai San Pedroko Aleka antzerki taldearen Koltxoi azpian, Gezala Auditoriumean.
Hilak 27, igandea
- 19:30: Durangoko Karrika antzerki taldearen Badator… etorriko da?, Gezala Auditoriumean.
- Ondoren: Debako Goaz antzerki taldearen Lotura basatiak, Gezala Auditoriumean.
Sarrerak
- Emanaldi bakoitzerako sarrera, 5 euro.
- Emanaldi guztietarako bonua, 10 euro.
