Iñigo Legorburu, genero beltzean ere maisu
Plentziako Javier Abasolo genero beltzeko kontakizunen lehiaketa irabazi du errenteriarrak.
Iñigo Legorburuk beste sari bat irabazi du. Sari bat gehiago. Iñigo Legorburuk bilduma handitzen jarraitzen du. Oraingoan, Plentziako Javier Abasolo genero beltzeko kontakizunen lehiaketa irabazi du errenteriarrak. Ez du berria sariketa Legorburuk; 2018an ere irabazi zuen euskarazko atalean lehiaketa hori.
Fifti-fifti lanak eman dio saria. Azken urteetan agertokian mendeku bila ibili den aktorea izan du protagonista lanean, “asko gozatu dut idazketarekin, eta oso pozik nago bai sariagatik bai emaitzagatik. Azken boladan ikuskizunaren mundua hartzen ari den itxurarekin ados ez dagoen aktore bati buruz idatzi dut; kontsumo azkarra, txabakanoa eta glamour falta dituena”.
Mexikon aurkitu zuen lana idazteko inspirazioa aitortu duenez, “mariatxi batzuen narcocorrido bat entzuten ari nintzela eta drogaren munduan goi karguak izan dituzten emakumeei buruz ezer ez nekiela konturatu nintzen. Hortik hasi nintzen hariari tiraka”.
Izengoiti gisa, Chavela Vargas, baliatu zuen errenteriarrak, “emakume gogor eta samurra, aldi berean”.
Lehenengo sariarekin, 300 euro irabazi ditu Legorburuk, eta bere kontakizuna Calibre 38 aldizkariaren webgunean irakurri ahal izango da beste finalisten lanekin batera.
