Xoxolur, igandean Tolosara
Mendizale lezoarrek Gipuzkoako Eskolen Arteko Topaketan parte hartuko dute igandean. Izen ematea, asteazkenera arte zabalik.
Urriko irteera Tolosara egingo du Lezoko Xoxolur Mendi Klubak. Igandean joango dira hara, baina ez dira bakarrik izango. Izan ere, Gipuzkoako Eskolen Arteko Topaketaren barruan Tolosa inguruan mendi ibilaldia izango da, eta han, lezoarrez gain, Gipuzkoako hainbat herritatik iritsitako mendizaleak izango dira. Xoxolurek han izateko izen ematea asteazkenera arte du zabalik: Orki tabernan dago zerrenda fisikoa, baina herriko mendizaleen posta elektronikora mezua idatzita ere eman daiteke izena. Helduen txartelaren prezioa 10 eurokoa da, eta haur-gazteena 8koa.
Tolosara igandeko 08:30ean abiatuko dira, Ijurkotik. Ibilaldia hiru bat ordukoa izango dela aurreratu dute, beti haurren erritmoa errespetatuz, naturaz gozatuz eta giro euskaldunean. Behin mendiko lanak eginda, inguruko herri bateko pilotalekura joango dira bazkaldu, eta jolastera. Bi motxila eramateko aholkua eman diete irteerarekin bat egingo dutenei: bata, mendira eramango dena, ibilaldia egiteko oinarrizko osagaiekin (ura, hamaiketakoa…), eta bestea, aldatzeko arropa nahiz bazkariarekin (autobusean geldituko da hasiera batez bigarren motxila hori).
Tolosakoaren ondoren, ondokoak dira Xoxolurrek urte bukaerara artean prestatu dituen proposamenak: azaroaren 17ean Lapurdiko Mondarrainera joango dira, eta abenduaren 1ean, berriz, Arantzako (Nafarroa) Izura. Horien izen emate epeen eta bestelakoen berri aurrerago emango du Xoxolurrek.
