Alaia Martin, finalerdietara
Gipuzkoako Bertsolari Txapelketako Eibarko final-laurdenekoa irabazi du oiartzuarrak, eta Manu Goiogana irundarra bosgarrena izan da. Atzo Oreretan izan zen final-laurdenetako saioa.
Eibarren izan zen seikotea, tartean Alaia Martin eta Manu Goiogana direlarik. Gipuzkoako Bertso Txapelketako final-laurdenak hasi dira. Nola gainera. Asteburu honetan Eibarren larunbatean eta Errenteria-Oreretan atzo (igandea) fase horretako lehen bi saioak jokatu ziren. Lehenean, Eibarkoan, Alaia Martin Etxebeste oiartzuarra eta Manu Goiogana Bengoetxea irundarra izan ziren: Martinek nagusitasunez irabazi, eta finalerdietarako zuzeneko txartela lortu zuen; Goiogana puntuetan bosgarren izan zen, eta beste hiru final-laurdenen zain da ea finalaurrekoetarako plazaren bat beretzat izango den jakiteko.
Errenteria-Oreretako atzoko final-laurdenean, berriz, Beñat Gaztelumendi Arandia añorgarrak alde handiarekin irabazi zuen. Harentzat, beraz, finalaurrekoetan izateko beste txartel bat. Lekuona Fabrika bete-bete zen saiorako, giro apartarekin.
Final-laurdenetako bost saio izango ditu Gipuzkoakoak. Horietan lehenek lortuko dute zuzenean finalerdietarako pasea. Gainera, puntu gehien lortzen dituzten beste hamahiruk egingo dute jauzi finalen atarikora.
Honakoak, bi final laurdenetako puntuazioak:
Eibarko saioa (larunbatean)
- 1. Alaia Martin Etxebeste 531,5 puntu.
- 2. Agin Laburu Rezola 503,5
- 3. Eneko Araiztegi Agirre 469.
- 4. Haizea Arana Cardenal 458,5.
- 5. Manu Goiogana Bengoetxea 448.
- 6. Aratz Igartzabal Bidegain 438.
Errenteria-Oreretako saioa (igandea)
- 1. Beñat Gaztelumendi Arandia 493 puntu.
- 2. Iñigo Gorostarzu Etxebeste 455.
- 3. Beñat Iguaran Amondarain 451,5.
- 4. Unai Gaztelumendi Arandia 444.
- 5. Oihana Arana Cardenal 440.
- 6. Aitor Salegi Martija 427.
Final-laurdenetako beste hiru saioetatik bat Irunen izango da, hilaren 27an (igandea) Ficobako antzokian. Bertan izango direnen zerrenda eta xehetasunak lortzeko baliatu esteka hau.
