Alkateen Itunarekin bat egin dezala eskatu dio gobernu taldeari PSE-EEk
Lezoko alderdi sozialistaren zinegotziaren esanetan aldaketa klimatikoa izango da Lezok datozen urteetan izango duen erronketako bat.
Lezo Klimaren eta Energiaren aldeko alkateen Itunera atxiki dadila eskatu dio gobernu taldeari alderdi sozialistak. Itun horretan parte hartzen duten Europako herri eta hirietako agintariek 2030 baino lehen CO2 isuriak %40 murrizteko konpromisoa hartua dute. Halaber, energia eraginkortasuna hobetzea, lurraldeetan energia iturri berriztagarriak erabiltzea eta klima aldaketaren ondorioetara egokitzeko neurriak garatzea suposatzen duela azaldu du PSE-EEk.
Lezoko alderdi sozialistaren zinegotziaren esanetan aldaketa klimatikoa izango da Lezok datozen urteetan izango duen erronketako bat. Gogora ekarri du halaber, 2019. urtean Lezoko Udalak PSE-EEren mozioa onartu zuela udalerrian larrialdi klimatikoa deklaratzeko, “besteak beste, klima aldaketaren eta energia eraginkortasunaren aurkako udal plan bat egitea jasotzen zen bertan, baita udalerria jasangarritasun energetikoari buruzko 4/2019 Legera egokitzea ere”. Iazko abenduan alderdi sozialistak klima aldaketaren aurkako udal plan bat egiteko, energia aurrezteko eta berriztagarriak erabiltzeko egindako proposamena ere onartu zela erantsi du eledunak.
Joxean Sanchez alderdi sozialistaren bozeramailearentzat “funtsezkoa” da onartutakoa “betetzea”, baita klima aldaketara “egokitzeko” estrategia “bateratu” baterantz aurrera egitea: “Ingurumen arkloko eragileen esperientziak eta indarguneak aprobetxatzeko unea da, energia fosilen kontsumoa eta berotegi efektuko gasen emisioa murrizten jarraitzeko, mugikortasun jasangarri baterantz eta etxeetatik enpresetara eta administrazioetara klima kontzientzia baterantz”.
Kritikarako tartea ere hartu du zinegotzi sozialistak komunikabideetara helarazitako prentsa oharrean, “udalak ez du Astekliman parte hartzen. Garrantzitsua da, bertatik herritarrei zuzendutako ekitaldiak antolatzen direlako klima aldaketaren aurka egiteko kontzientziatu eta motibatzeko”.
