Genozidioa eteteko eskatu dute
Gaza erdigunera ekarri zuten atzo Euskal Herriko 178 herritako plazetan. Errenteria-Oreretako Herriko Plazan hamarka herritar bildu ziren genozidioa salatzeko.
Palestinaren aldeko elkarretaratzea atzo arratsaldean Errenteria-Oreretako Herriko Plazan. Gaza erdigunera ekarri zuten atzo Euskal Herriko 178 herritako plazetan. Israelek Palestinaren aurka inoizko erasorik bortitzena hasi zuenetik urtebetera, 43.000 palestinarretik gora hil ditu eta Gazako azpiegituren %70 suntsitu du Israelgo armadak. Urtebete joan da, eta genozidioak ez du etenik.
Hura gelditzeko eskatu zuten hamarka herritarrek Errenteria-Oreretako Herriko Plazan Genozidioa gelditu. Bakea, justizia, itxaropena leloa zuen pankartaren atzean. Milaka kilometrora, Gazara begira jarri dira adineko, gazte eta haurrak, haien mina bertakoen oinazea dela esateko, mendebaldeari duen ardura har dezan exijitzeko, ezikusiarena egiteari utz diezaiotela galdegiteko, Palestinako Estatua aitortuta su etena eta negoziazioa zabaltzea eta garbiketa etnikoa gelditzeko esateko.
Elkarretaratze bukaeran irakurri zuten Leire Vargas bertsolari, idazle eta itzultzaile durangarraren olerkiak gordin azaldu zuen Palestina, gordin mendebaldearen indiferentzia, eta letra larriz aipatu genozidioa eta hura gelditu beharra.
Arratsaldeko elkarretaratzeaz gain, goizean ikastetxeetan eta enpresetan egin zituzten elkarretaratzeak Palestinaren alde. Albiste bukaeran, Orereta Ikastolak eta Koldo Mitxelena Herri Ikastetxeak zabaldutako elkarretaratzeen irudiak, arratsaldeko protestaren beste batzuekin batera.
Ondokoa, Vargasek atzoko elkarretaratzeetan irakurtzeko sortutako olerkia osorik.
Zelan egin berba herri bati
non gosariko janak bonba usaina duen egunero gosaritarako bonbak ez diren ezer baldin bada
batere.
Herri bati
non heriotza arnasaldi artean den gertatzen,
hala esan dit Mohammed El-Kurdek, nik heriotzaz ez baitakit ezer.
Nik ez dakit ezer
hemen nire gela aratzean nire aulki erosoan
hemen Gernikaren herrian
gure herri kolonizatu eta inoiz kolonizatzaile eta berdin
mendebaldarrean milaka kilometrotara kafea eta ehun goxoak
haurren bat jolasean auto bat pasatzean besterik ez da entzuten entzungor egin dezaket
zergatik da hain erraza entzungor egitea?
Genozidio bat
milaka kilometrora ere entzun beharko litzateke. Nik ez dakit ezer.
Baina gogoan dut andre ileurdin bat Parisko manifestazio jendetsuan
zelan etorri zitzaidan esku arteko kartelak zer ote zioen galdetzen Palestinako genozidioa euskaraz idatzita egonagatik nahiko unibertsala ez balitz lez
zer eta esateko
ez da genozidioa
ez da genozidioa zioen
ez ozeanoaz bestaldeko politikari batek
ez ozta-ozta ulertzen ditudan hizkuntzetan idatzitako komunikabideek
baizik eta une hartan nire parean emakume ileurdin batek
eta zelan ez dela genozidioa
zelan ezetz errefuxiatu-guneak ari direnean bonbardatzen
euren gorputzaz gain dena kendu dioten – euren gorputza baino ez duten pertsonak direnean jo-puntua
eta gorputza ere ari zaienean ahitzen gosea, polioa eta hepatitisa
euren gorputza Gazako lurraren fruitua delako
gorputz oro gorpu izan arte ez dutelako lurperatuko Palestina eta zelan ez da hori izango
genozidioa
24 orduko epea etxetik alde egiteko
norabait edonora joan zaitez alde hemendik zure lurra ez da zure lurra
elikagaiz betetako kamioietara oldean hurbildutako herritar sarraskituak
elikagai bila oldean oldean sarraskituak herritarrak helduak umeak herritarrak zibilak
tankeen kontra harriak
lurra defendatzeko lurra bera ez dagoenean besterik
sarraskia gosetea tortura
alez ale gure hiztegian txertatzen goazen zentzugabekeriak harik eta gure zentzuzko egunerokotasun normalean paisaiako elementua diren arte
urrutiko paisaia zarata gabea
eta galdetu nahi dut zelan heldu garen honaino
baina bada azalpenik
80 urtetako historia koloniala eta bost bat mende aurretik gutxi batzuen aberastasuna askoren minaren lepotik
mendebaldea ekialdeaz bazkatzen beste behin
eta zergatik ez
zertan eztabaidatu egingo genukeen moduan joko- zelaia malkar bat ez balitz
malkarra da
Estatu Batuek betatu badezakete nazioarteko justiziak epaitua
zer da Nazio Batuen Erakundea
zer Nazioarteko Zigor Auzitegia
onartzen bada nazioarteko legea
(bere horretan luze eman genezakeena kritikatzen)
gutxiengo boteretsuenek nahieran oker dezaten
eta onartu diodanean esan nahi dut jarraitzen dugula egunero ordu berean jaikitzen ogia erosten
lanera joaten poteak hartzen
normala balitz lez
eta ez dakit normala den honezkero ez dakit normala definitzen baina noski badela logikoa
kolonialismo neoliberalaren ondorio guztiz zentzuduna zentzugabekeria hutsa den arren
sarraskia den arren genozidioa
logikoa
eta nola geldiarazi ez badugu logika hori iraultzen?
20 urtean 40 urtean
ez dakit non egongo garen
seguruenik biziko gara oraindik ere eliteei gure existentzia errentagarri bazaie
edo aldatu badugu zeozer
jaiotzen eta jaiotzear daudenek genozidioari pentsaezina iritziko ote diote
galdetuko ei dute
zelan gertatu ote zen
zelan utzi ote zuten hori gertatzerik zelan utzi ote genuen
zelan ari ote gara uzten
ikasiko al dugu?
Zergatik ez dugu honezkero ikasi?
Beti da beranduegi
eta horrexegatik
hau da unea.
-
- Palestinaren aldeko elkarretaratzea atzo arratsaldean Errenteria-Oreretako Herriko Plazan.
-
- Palestinaren alde atzo arratsaldean Herriko Plazan, eta Orereta Ikastolan zein Koldo Mitxelena Herri Ikastetxean eguerdian.
