"Salbu al gaude, akaso? Bihar gu izan gintezke"
Palestinako genozidioarekin bukatzeko oihu ozena atzo Lezon. Palestinar jatorriko herritarrek hitza hartu dute.
Isila baina minez betea. Halakoa izan zen atzo Gernika Palestina herri mugimenduak deituta Lezon egin zen elkarretaratzea. Dozenaka eta dozenaka herritar jarri ziren udalaren atarian “genozidioa stop!” esateko. Pankartak, eskuko kartelak, Palestinako banderak, megafoniatik sirena hotsak eta egunerako propio prestatutako olerkia, eta han urrunean bizi duten egoeraren jakitun, aurpegi arduratu eta jarrera arduratsua. Urrun izanda ere, handiak txikia suntsitu nahi duenean Lezok erantzuten duelako. Hala izan zen atzokoan. Palestinar jatorriko lezoarrek hitza hartu zuten elkarretaratzearen bukaeran. Milaka dira Israelek Palestinan hil dituenak. “Hemen salbu al gaude, akaso? Bihar gu izan gaitezke”, esan zuten emakume palestinarrek.
Bihotz minduetatik idatzitako testua irakurri zuten atzoko elkarretaratzearen bukaeran palestinarrek. Emozioz beteriko diskurtsoa izan zen, baina irmo mintzatu ziren. Mundu mailako agintariei erreferentzia egin zieten, esateko izu direla haien erabakiez, babesgabe sentitzen direla, “baina gutako askok geure buruari galdetzen diogu ea zerbait egin dezakegun. Ez al dugu botererik? Haiek bakarrik geldi dezakete hau?”. Zentzu horretan, herritarren eta herrien boterean sinistu behar dela adierazi zuten, eta Palestinako sarraskiari aurre egiteko herritarren boterean eta antolatutako lan kolektiboan konfiantza izan behar dela. Atzoko elkarretaratzea horren erakusle izan zen: “Humanitatea berriz ere humano izatea behar dugu, urgentziaz. Denon odola kolore berberekoa da. Ez ditugu gezurrak onartu behar. Ezin dugu onartu hainbesteko krudelkeria eta horri aurre egin gabe jarraitu. Konpromisoa gugan hasten bada, min gehiago egitea ekidingo dugu konpromisotik. Orain, agian ez dugu emaitza ikusiko, baina epe ertain edo luzera mundu hobea lortuko dugu”.
Giza eskubideen gaineko kontzientzia hartzea. Hori jarri zuten giltzarritzat palestinar hizlariek. “Ez da beste alde batera begiratu behar. Orain, ahotsa, erresistentzia, pazientzia, eta bizia dira dituzten armak. Zein adoretsua den Palestina. Balea handia da, baina hain da txikia itsasoaren zabalean! Palestina aske errekatik itsasora!”,
Jarraian, atzoko elkarretaratzean irudi sorta eta bideoa, tartean palestinarren hizketaldia dela.
