Katealegaia bisitatu dute udaleko, Don Boscoko eta Oarsoaldea Garapen agentziako ordezkariek
Bisita horretan desgaitasuna edota gizarte eta enplegu bazterkeria egoeran diren pertsonentzat sortu dituzten lan aukerak lehen eskutik ezagutu dituzte.
Katealegaiara bisita. Argazkia: Herri Bizia Katealegaia irabazi asmorik gabeko lan sozietatea bisitatu dute Errenteriako Udaleko, Oarsoaldea Garapen Agentziako, eta Don Boscoko ordezkariek. Bisita horretan, desgaitasuna edota gizarte eta enplegu bazterkeria egoeran diren pertsonentzat Gipuzkoan oro har eta Errenteria-Oreretan zehazki, sortu dituzten lan aukerak sortu eta mantentzeko egiten duten lana lehen eskutik ezagutu dute.
Industriarako askotariko teknologiadun osagaiak industrializatzen, ekoizten, muntatzen, eta kontrolatzen ditu Katealegaiak, eta egoitza nagusia Hernanin badu ere, Errenteria-Oreretan ere badu egoitza, eta bertan 20 pertsona inguru aritzen dira lanean.
Proiektua gertutik ezagutu, Oarsoaldean eta bereziki Errenteria-Oreretan duen izaera eta funtzioa azaldu, eta beste eragile sozio laboralekin dituen lankidetzak partekatu ditu Katealegaiak. Egungo jarduera industrialaren egoera ere aztertu dute bisitan, eta aurrera begira ere jarri dira, asmo eta proiektu berriak partekatuta.
