Mintzalaguntzaile bila ari da Lau Haizetara
Izena eman duen mintzalagun kopuruari erantzuteko taldeak dinamizatuko dituzten mintzalaguntzaileak behar ditu euskara elkarteak.
Xixilio Maritxalar eta Ximun Leturia Lau Hazietara topaguneko kideak. Mintzalaguntzaile bila ari da Lau Haizetara Euskaltzaleon Topagunea. Mintzalagun kanpaina betean ari da euskara elkartea, eta izen eman duen jende kopuruari erantzun ahal izateko, taldeak gidatuko dituzten mintzalaguntzaileak behar ditu.
Euskaldun zaharrak, edota euskara maila egokia izan behar da mintzalaguntzaile izateko. Horretaz gain, astean behin ordu eta erdiko tarte bat izatea ere ezinbesteko baldintza da.
Mintzalagunak euskara erabiltzeko espazioa ez dutenei, ikasitakoan sakondu nahi dutenei, edo ez erabiltzeagatik herdoildua dutenei hizkuntzan barrena bidaiatzeko aukera eskaintzen die. 2000. urtean hasi zen Mintzalaguna antolatzen Lau Haizetara elkartea. Egitasmoa ez da soilik euskara ikasleei begirakoa: «Euskara maila bat izatea nahikoa da, eta hura hobetu, praktikatu nahi izatea. Hizkuntza herdoilduta duten euskaldun zaharrek ere badute leku gurean. Etortzen direnek sentitzea nahi dugu hau euren lekua dutela». Euskara jakin bai, baina egiteko lotsa sentitzen dutenek askatzeko gunea ere bada Mintzalaguna, «konfiantza hartzen doaz giro atsegin eta egokian».
Doakoa da Mintzalaguna, eta astean behin elkartzen dira ordu eta erdiz euskaraz hitz egiteko lauzpabost kidek eta mintzalaguntzaile batek osatutako taldeak. Arnasgunearen parte izan eta euskarari hauspoa eman nahi diotenek mintzalaguntzaile gisa, 613 25 49 04 telefono zenbakira deitu behar dute izena emateko; presentzialki egiteko aukera ere badago, eta horretarako, elkartearen bulegora —Joxepa Antoni Aranberri anitzenea— joan behar dute astearte eta ostegunetan, 18:00etatik 20:00etara.
