Lezoartasuna, 2025eko udal egutegietan
2025ko udal egutegia osatzeko argazki lehiaketa abian du udalak. Horien izaerak lezoartasun kutsukoa izan behar da: herriko une eta toki kuttunetakoak behar dute izan.
'Kuxkuxean' argazkiarekin irabazi zuen iaz lehiaketa Ager Arrietak. Azken urteetan egin bezala, 2025eko udal egutegien egunen zerrendak apaintzeko helburuz argazki lehiaketa abiatu du. Argazkiak entregatzeko epea hilaren 22ra arte izango da zabalik, eta udalaren webgunearen bidez nahiz aurrez aurre (astegunetan, 08:30-13:30 tartean Kultura Aretoan) eman daitezke. Egile bakoitzak gehienez bost argazki bidal ditzake. Gai zehatza du lehiaketak, izaera hori izan behar dute irudiek. Lezoartasunari keinu egin diote lehiaketaren gaiaren aukeraketan: Lezoko toki edo momentu kuttunak.
Aurkeztuko diren argazkiak horizontalak (etzanak) izan behar dute, eta euskarri informatikoan (JPG edo PNG) edo paperean aurkez daitezke. Epaimahai eskarmentudun batek hamahiru argazki aukeratuko ditu: paretako eta mahaiko egutegien azal izango dena da bat, eta aldi berean lehiaketaren irabazle izango dena (200 euroko saria izanen du, herriko saltokietan erosketak egiteko bonua da), eta beste hamabiak hil bakoitzeko zenbakien zerrendaren alboan joango direnak izango dira. Irudi horiek aurrez argitaragabeak behar dute izan. Xehetasun gehiago nahi izanez gero, egin klik esteka honetan.
Daten erreparatuta, honakoa da lehiaketaren kronograma:
- Azaroaren 22ra arte dago argazkiak aurkezteko epea.
- Azaroaren 29an aukeratuko ditu epaimahaiak irabazlea eta 12 finalistak.
- Abenduaren 9tik aurrera aukeratutako hamahiru argazkiak ikusgai izango dira udalaren webgunean.
- Abenduaren 19an hasiko dira egutegien banaketarekin.
