Urdabururekin goizean Hondarribira, eta ilunabarrean izarretara
Azaroaren 9ko goizean ipar martxako irteera egingo dute Hondarribira, eta ilunabarrean Bizarainera mendi buelta, eta izar-ilargi ikustaldia Añabitarten.
Plan bikoitza proposatu du Errenteria-Oreretako Urdaburu Mendizale Elkarteak azaroaren 9rako. Goizean Hondarribitik zehar asfaltoko ipar martxako ibilbidea egingo dute, eta egun horretako ilunabarrean herriko Bizarain mendira joango dira izarrak ikustera.
Goizean, Hondarribiko paseo osasuntsua egin asmo dute, ipar martxako modalitatean. Hamar kilometro inguruko bidea da, Hondarribiko hainbat toki esanguratsutatik igarotzen dena. Bidasoko herrira joateko azaroaren 9ko 08:35ean gelditu dira Iztietako geltokian, Ekialdebuseko autobusa 08:45ean aterako baita. Hondarribira zuzenean joan nahi dutenek, Arraun Etxea jatetxean egon beharko dute Errenteriatik autobusean datozen martxakideekin bat egiteko. Ura, kiroletako oinetakoak eta ipar martxako makilak eramatea aholkatu dute elkartetik.
Goizeko ibilbide horretarako izen ematea azaroaren 8ra arte izanen da zabalik, aurrez aurre mendizaleen elkartearen egoitzan edo telefono deia eginez 943 52 78 79 edo 686 59 67 32 telefono zenbakietara, astearte eta ostegunetan, 19:00etatik 21:00etara. Formularioa ere jarri dute izena eman nahi dutenen eskura.
Izarrei begira
Goizekoak eginda, azaroaren 9ko (larunbata da) eguna ezin hobe bukatzeko beste irteera bat landu du Urdaburuk. Orereta Ikastolaren Añabitarteko egoitzatik hasita, Bizarain mendira joango dira gaueko bira ematera (6,5 kilometrokoa), eta berriz ere Añabitartera itzuliko dira partaideak. Han direla otordutxoa jateko aukera izanen da, 10-12 euroko preziokoa partaideen kopuruaren araberakoa. Behin afaritxoa eginda, Enrique Sanchez astronomoaren azalpenekin eta teleskopio bidez izarrak eta ilargia hurbil ikusiko dituzte.
Ilunabarreko ibilbide, afaritxo eta izar-ilargi begiztatzerako izen emate epea ere zabalik da hilaren 7rako 19:00ak arte. Aurrez aurre egin daiteke hori mendizaleen elkartearen egoitzan, edo telefono deia eginez 943 52 78 79 edo 686 59 67 32 telefono zenbakietara, astearte eta ostegunetan, 19:00etatik 21:00etara. Formularioa ere jarri dute izena eman nahi dutenen eskura.
Jarduera gehiago
Azaro mamitsua prestatu du Urdaburu Mendizale Elkarteak. Azaroaren 9ko jarduera horiez gain, beste hainbat landu dituzte. Honako zerrendan dauden estekak balia daitezke horien berri izateko.
